ქარის წისქვილების, ყველის, ტიტების, მუზეუმების, ველოსიპედებისა და ლიბერალური კანონების ქვეყანა - ეს ნიდერლანდებია.

ევროკავშირში ვიზალიბერალიზაციამ ქართველებს საკმაოდ დიდი ბიძგი მისცა საოცნებო ადგილების მოსანახულებლად. იმისათვის, რომ საქართველოდან ამ საოცარ ქვეყანაში მოხვდეთ, თვითმფრინავის ბილეთებისა და საცხოვრებლის ჯავშანის დოკუმენტები გჭირდებათ. თუკი უკვე იმყოფებით შენგენის ზონის რომელიმე ქვეყანაში, მაშინ უკვე გაცილებით სწრაფად და მარტივად შეგიძლიათ მოგზაურობა. თუ თვალი ამსტერდამისთვის გაქვთ დადგმული, ეს რამდენიმე რჩევა საქმეს გაგიადვილებთ.

როგორ დავგეგმოთ მარშრუტი და დავზოგოთ თანხა?

თბილისიდან ამსტერდამის მიმართულებით უამრავი ფრენა ხორციელდება. 2019 წლის 1 აგვისტოდან კი ქუთაისიდანაც შეგვეძლება პირდაპირი რეისით ეინდჰოვენში ჩაფრენა. მთავარია ნიდერლანდების რომელიმე ქალაქის სადგურში მოხვდეთ და შემდეგ თავიანთი ძალზედ გამარტივებული სატრანსპორტო სისტემის წყალობით, ქალაქებს უპრობლემოდ მოინახულებთ. გირჩევთ შეიძინოთ OV Chipkaart - ჩვენი მეტრომანის ანალოგია და თანხა მასზე დარიცხეთ. მისი ყიდვა ნებისმიერ რკინიგზის სადგურზე შეგიძლიათ. ამ კარტით შეძლებთ მატარებლის სადგურებზე შესვლას, გამოსვლის დროს კი ისევ გაატარებთ, რათა მგზავრობის ღირებულება დაფიქსირდეს და კარტიდან ჩამოიჭრას შესაბამისი თანხა. არ შეიძინოთ ერთჯერათი ბილეთები, გაცილებით ძვირია და მოუხერხებელი. შეიძლება მატარებელზე გაგვიანდებოდეთ, ამ დროს კი ბილეთის შეძენა ვერ მოასწროთ, დროსთან ერთად ენერგიაც დაგეკარგებათ. გამოიყენეთ 9292 აპლიკაცია, მთელი ქვეყნის მასშტაბით შეგიძლიათ აირჩიოთ ქალაქების სადგურები და პროგრამა გიჩვენებთ დროს, პლატფორმის ნომერსა და მგზავრობის ღირებულებას. ასევე, შეგიძლიათ ჯგუფური ბილეთი შეიძინოთ, მინიმუმ 4 ადამიანისაგან შემდგარი და დაზოგოთ მგზავრობის თანხა. მაგალითად, ამსტერდამიდან როტერდამში წასასვლელად OV Chipkaart-ზე მინიმუმ 16.10 € გჭირდებათ, 4-წევრიანი ჯგუფური ბილეთის შეძენის შემთხვევაში 8 €-ს გადაიხდით, 7 წევრზე კი 5.21 €-ს. მათი შეძენა ელექტრონულად შეგიძლიათ www.ns.nl - ვებგვერდზე.

აუცილებლად სანახავი ადგილები

გამოიყენეთ შესაძლებლობა და მაქსიმალურად ბევრი ქალაქი მოინახულეთ. ნიდერლანდები მხოლოდ ამსტერდამი არ არის. ჩასხედით კომფორტულ მატარებელში და გაემგზავრეთ უტრეხტში, ჰააგაში, როტერდამში, მაასტრიხტში. უტრეხტი პატარა ამსტერდამია, თუმცა, ნაკლებად ქაოტურია. ამ ქალაქში, გირჩევთ, უბრალოდ დაივიწყოთ დროისა და რუკის არსებობა და დაიკარგოთ. დაათვალიერეთ არქიტექტურა, დააკვირდით უფარდო ფანჯრებს და მოუსმინეთ ქუჩის ხელოვანებს.

აუცილებლად ეწვიეთ ამსტერდამისა და ჰააგის მუზეუმებს. ბილეთების ფასი საკმაოდ ძვირია და სამწუხაროდ, არანაირი შეღავათი არ აქვთ მათზე. გირჩევთ, გადმოწეროთ აპლიკაციები, რომლებიც გიდის ფუნქციას შეასრულებენ, თითოეულ მუზეუმს თავისი აპლიკაცია აქვს. აუცილებლად ნახეთ Rijksmuseum, Van Gogh ერთ სივრცეშია და გადაადგილება არ დაგჭირდებათ. აგრეთვე Heineken Experience მუზეუმი და მადამ ტიუსოს სალონი.

შემდეგ გირჩევთ Vlaams Friteshuis ფრი დააგემოვნოთ, იქვეა, 1.5 € ღირს და უგემრიელესია. საღამო Hills Street Blues ბარში გაატარეთ, რომელიც არხზე დგას და ულამაზესი ხედი აქვს. კედლები გრაფიტით არის სავსე, ბარი კი - მთლიანად ახალგაზრდებით. იქ ყოფნით შეიგრძნობთ ამსტერდამის ადგილობრივ ღამის მუხტს.

სად შეგიძლიათ დარჩეთ?

თუ მეგობრებთან ერთად ხართ, Airbnb საუკეთესო ვარიანტია, ბინები ხელმისაწვდომია როგორც ცენტრში, ასევე გარეუბნებში. საოჯახო ტიპის სასტუმროებშიც შეგიძლიათ დარჩეთ, მაგრამ აუცილებელია რამდენიმე კვირით ადრე დაჯავშვნა. თუ მარტო მოგზაურობთ ან მხოლოდ ორნი, შეგიძლიათ ისარგებლოთ couchsurfing-ით. არაერთხელ გამომიყენებია და ვურჩევ ნებისმიერ ადამიანს, განსაკუთრებით მათ, ვინც თავგადასავლების ძიებაში არიან და ადგილობრივი კულტურის შეგრძნება ბოლომდე სურთ. ამ აპლიკაციის საშუალებით, შეგიძლიათ მოძებნოთ ჰოლანდიელები ან ნიდერლანდებში მცხოვრები ახალგაზრდები, რომლებიც გიმასპინძლებენ რამდენიმე ღამით და არანაირი თანხის გადახდას არ გთხოვენ. ამისთვის უბრალოდ გადმოწერეთ აპლიკაცია, შექმენით თქვენი პროფილი და მოძებნეთ კეთილი და საინტერესო ადამიანები.

სად უნდა იყიდოთ პროდუქტები?

ნიდერლანდებში ტრანსპორტით სარგებლობა, მუზეუმების მონახულება და პროდუქტების შეძენა დიდ თანხებთან ასოცირდება. თუმცა, არსებობს ერთი გერმანული სუპერმარკეტი, Lidl, რომელიც გაცილებით იაფია. სგირჩევთ, უყურადღებოდ არ დატოვოთ ყვითელ წრეში ამოპრინტერებული ლურჯი ასოები და ყველაფერი იქ შეიძინოთ.

ასე რომ, ჩაალაგეთ ბარგი და ეწვიეთ ამ მაგიურ ქვეყანას, რომელსაც ძალიან დიდი ენერგია აქვს და დიდი ხნით შეუძლია თქვენში საოცარი განწყობის შენარჩუნება.

აღმოსავლეთ პარტნიორობა წელს ათი წლის იუბილეს ზეიმობს. ეს თანამშრომლობა ევროკავშირს, მის წევრ ქვეყნებსა და საქართველოს შორის, მნიშვნელოვანი სარგებლის მომტანი აღმოჩნდა ჩვენი თანამოქალაქეებისათვის. ვიზალიბერალიზაცია ერთ-ერთი გამორჩეული მიღწევაა, რამაც საქართველო ევროკავშირთან უფრო მეტად დააახლოვა. დაახლოებით 300,000-მა საქართველოს მოქალაქემ უკვე იმოგზაურა ევროკავშირის ქვეყნებში ვიზის გარეშე და ახალი ტურისტული ღირსშესანიშნაობები აღმოაჩინა.