რესპუბლიკური პარტიის წევრი, ფრიდონ საყვარელიძე On.ge-სთან საუბარში განმარტავს, რომ არჩევნებში მისი პარტიის გამარჯვების შემთხვევაში, მასწავლებლის წლიური ხელფასი დაახლოებით 10 ათასი ლარი მაინც უნდა იყოს:

"ჩვენს ევროპელ პარტნიორებს ხშირად უთქვამთ ევროპაზე არც იოცნებოთ, სანამ თქვენი მშპ და ქვეყნის წლიური ბიუჯეტი იმის ნახევარი მაინც არ გახდება, რაც ევროკავშირის ახალი წევრის ქვეყნების არისო. ანუ 40 მილიარდი თუ არის რუმინეთის, ჩვენი 20 მილიარდი მაინც უნდა იყოს”.

მისივე თქმით, დღეს მშპ-ს 1,8 პროცენტი განათლებისა და მეცნიერების დაფინანსებისთვის არის გამოყოფილი, თუმცა, სავსებით რეალურია, რომ 5 პროცენტი - ნახევარი მილიარდი ლარი ამ სფეროზე დაიხარჯოს:

"ბიუჯეტის გადანაწილების ხარჯზე უნდა მოხდეს ეს, მაგრამ ამასთან ერთად სახელმწიფომ კერძო სექტორი უნდა წაახალისოს იმისთვის, რომ ეს ამოცანა ამოიხსნას".

მისი თქმით, სკოლას მაქსიმალური ავტონომია უნდა მიენიჭოს, შესაბამისად საკითხი, ვისთვის იქნება სკოლის სახელმძღვანელოები უფასო და ვისთვის - არა, სკოლის შიგნით უნდა გადაწყდეს.

საყვარელიძის თქმით, რესპუბლიკელები ასევე მიიჩნევენ, რომ ერთიანი ეროვნული გამოცდების დროს უნარ-ჩვევების ჩაბარება აუცილებელი არაა, რადგან ამ საგანს მოსწავლეებს სკოლაში არ ასწავლიან.

ის ასევე განმარტავს, რომ რესპუბლიკული პარტიის აზრით, უმაღლეს სასწავლებლებში ჩარიცხვისას სტუდენტებს ოთხწლიანი გრანტი კი არ უნდა ენიჭებოდეთ, არამედ მათი გრანტი წლიდან წლამდე უნდა გადაიხედოს იმისთვის, რომ გადაწყდეს, შეუნარჩუნდება თუ გაუუქმდება ის სტუდენტს მისი აკადემიური მოსწრების შესაბამისად.

ვრცლად პოლიტიკური სუბიექტების საარჩევნო პროგრამების შესახებ ინფორმაცია შეგიძლიათ იხილოთ აქ:

პარტიების დაპირებები და ხედვა განათლების სისტემის შესაცვლელად