სახალხო დამცველმა, უჩა ნანუაშვილმა განაცხადა, რომ შსს-მ გამყოფი ხაზის სოფლების იმ ტერიტორიაზე, რომელიც ქართული საგუშაგოების მიღმა მდებარეობს, პატრულირება უნდა გააძლიეროს. ამასთან, პროკურატურას გიგა ოთხოზორიას მკვლელობის დროული გამოძიებისკენ მოუწოდა:

"პროკურატურამ დროულად უნდა გამოიძიოს მოქალაქე გ.ო.-ს მკვლელობის საქმე, მათ შორის აფხაზურ მხარესთან თანამშრომლობით. აღნიშნული საკითხი განხილულ იქნას არა პოლიტიკურ არამედ სამართლებრივ ჭრილში და მიღებული იქნას ყველა საჭირო ზომა დამნაშავე პირის პასუხისგებაში მიცემის მიზნით".

ომბუდსმენმა სამეგრელოსა და აფხაზეთის გამყოფ ხაზზე მდებარე სოფლების, ხურჩის, ფახულანისა და წყოუშის მოსახლეობის უფლებრივი მდგომარეობა თავის ანგარიშში განიხილა. მისი განმარტებით, ხურჩაში ქართული პოლიციის პუნქტი სოფლის დასაწყისშია განლაგებული და ეს გარემოება მოსახლეობისათვის უსაფრთხოების პრობლემებს ქმნის, რის მაგალითადაც ის ოთხოზორიას მკვლელობას ასახელებს:

"ხურჩაში, ისევე როგორც გამყოფი ხაზის სხვა სოფლებში ხშირია უკანონო დაკავებები ე.წ. საზღვრის უკანონო გადაკვეთის ბრალდებით. დაკავებულებს შორის წლების განმავლობაში იყვნენ სკოლის მოსწავლეები, სოფლის ადგილობრივი მაცხოვრებლები და გალის მოსახლეობა".

მისივე თქმით, სოფელ ფახულანსა და წყოუშში 2013 წლიდან მოსახლეობის საკარმიდამო ნაკვეთებში მავთულხლართებია გავლებული, რაც მათ მიწით სარგებლობის საშუალებას უზღუდავს:

"ფახულანში პრობლემად რჩება მდინარე ოლორზე ხიდის არარსებობა, რომელიც სოფლის რამდენიმე უბანს აკავშირებს ერთმანეთთან. ასევე, გასამაგრებელია მდინარე ოლორის ნაპირები, რადგან მისი ადიდებისას წყალს მიაქვს მოსახლეობის სახნავ-სათესი მიწები და მოსავალი".

სახალხო დამცველი რეკომენდაციით მიმართავს ზუგდიდისა და წალენჯიხის გამგეობებს, ენერგეტიკის, საგარეო და შს სამინისტროებსა და პროკურატურას, ის მათ უწყების შესაბამისი კომპეტენციის რეაგირებისკენ მოუწოდებს.

19 მაისს ზუგდიდის რაიონის სოფელ ხურჩაში, საოკუპაციო ხაზის მიმდებარედ, გალის რაიონის სოფელ ბარღების მკვიდრი, გიგა ოთხოზორია მოკლეს.