ქართული ოცნებიდან წასულმა დეპუტატმა ლევან კობერიძემ თქვა, რომ თავს მოტყუებულად გრძნობს, ვინაიდან საკონსტიტუციო ცვლილებებს ხმა გუნდურობის პრინციპით მისცა, რომ ეს იქნებოდა სასამართლოს რეფორმის საფუძველი. ამის შესახებ მან TV პირველის ეთერში, ნინო ჟიჟილაშვილთან ინტერვიუში განაცხადა.

"მივიღეთ კონსტიტუცია, რომელსაც ახლა ჩვენ თვითონვე, უმრავლესობა განხილვების დროს ფარად იყენებდა. მე პირდაპირ ვიტყვი, რომ თუ კონსტიტუცია იქნება შესაცვლელი, ისიც უნდა შეიცვალოს... თუ ჩვენ კონსტიტუციაში ვხედავთ რაიმე შეუსაბამობას, დღეს არანაირი პრობლემა არ არის რომ შეკრებილიყო საჭირო რაოდენობის ხმები. შევიტანეთ კონსტიტუციაში ცვლილებები, მიღების შემდეგაც. ახლა კი ფარი აღმოჩნდა და იუსტიციის საბჭოს შეუქმნა რაღაც კომფორტი".

ლევან კობერიძემ მადლობა გადაუხადა იუსტიციის საბჭოს არამოსამართლე წევრებს, ნაზი ჯანეზიშვილსა და ანა დოლიძეს და თქვა, რომ მათ ამ თემების [სასამართლო რეფორმის] "ალარმიზაცია" მოახდინეს.

ლევან კობერიძემ საპარლამენტო უმრავლესობა დღეს, პირველ მაისს დატოვა. იგი იყო დეპუტატი, რომელმაც ალექსანდრე ერქვანიასთან ერთად მოსამართლეების კანონპროექტს მხარი არ დაუჭირა. მისი განმარტებით, გადაწყვეტილების მიღების მიზეზი მოსამართლეების შესახებ კანონპროექტის მიღება გახდა.

უზენაესის მოსამართლეთა არჩევისა და წარდგენის კრიტერიუმებისა და პროცედურების შესახებ კანონი საქართველოს პარლამენტმა მესამე მოსმენით დაამტკიცა.