თბილისის მერის, კახა კალაძის განცხადებით, თბილისის ათივე რაიონში გარემოვაჭრეებისთვის უფასო ადგილები გამოიყოფა. ამ ლოკაციებზე პროდუქტის გაყიდვა კვირაში 2-3 დღე იქნება შესაძლებელი. ამის შესახებ მან დედაქალაქის მთავრობის სხდომაზე ისაუბრა.

კალაძის თქმით, გარემოვაჭრეებმა უნდა გაიგონ, რომ არის ადგილები, სადაც ვაჭრობა დაუშვებელია. მისი განცხადებით, ეს სერიოზული პრობლემაა და დისკომფორტს წარმოადგენს გამვლელებისთვის და იქ მყოფი ადამიანებისთვის. შესაბამისად, კალაძე ამბობს, რომ ეს ყველაფერი უნდა დარეგულირდეს.

"ჩვენგან იქნება ხელშეწყობა. ყველა რაიონში იქნება კონკრეტულია ადგილები, რომელიც იქნება კეთილმოწყობილი, ლამაზად გაფორმებული. ყოველგვარი ანაზღაურების გარეშე, უფასოდ გექნებათ შესაძლებლობა, თქვენ მიერ წარმოებული პროდუქტი მიიტანოთ და გაყიდოთ", — თქვა კალაძემ.

მისივე ინფორმაციით, ადგილების მოსაწყობად ტენდერი რამდენიმე დღეში გამოცხადდება და კონკრეტული ადგილები ამის შემდეგ გახდება ცნობილი.