გირჩი ეკონომიკის სამინისტროს ექვსთვიანი დუმილის სანაცვლოდ 450 ათას ლარს სთხოვს. ასე გამოეხმაურა პარტია ამ სამინისტროს დაქვემდებარებული უწყების მიერ "ეკონომიკური განვითარების შეუქცევადობაზე" აზრის დასამკვიდრებლად ბიუჯეტიდან 900 ათასი ლარის დახარჯვის ინიციატივას.

"გამომდინარე იქიდან, რომ ჩვენი აქტიურობის პირობებში წარმოუდგენელია რომელიმე ქვეკონტრაქტორმა რაიმე წარმატებას მიაღწიოს დასახულ მიზანთან მიმართებაში (დაარწმუნოს მოსახლეობა, რომ ქვეყნის ეკონომიკური განვითარება შეუქცევად ფაზაშია), გთავაზობთ ეკონომიკისა და მდგრადი განვითარების სამინისტროს: ბიუჯეტით გათვალისწინებული 900 ათასი ლარიდან ნახევარი მოგვცეთ ჩვენ 6 თვიანი დუმილის სანაცვლოდ", — აცხადებენ პარტიაში.

მათივე განმარტებით, პარტია დაარსების დღიდან ცდილობს საზოგადოებაში საპირისპირო აზრის დამკვიდრებას. კერძოდ, საქართველოს გაცილებით სწრაფი ეკონომიკური განვითარების პოტენციალი აქვს და ბუნებრივ პროცესს ხელს სახელმწიფოს ზედმეტი აქტიურობა უშლის.