სამივე სინჯის ოლიმპიური მედლის მფლობელი, ოლიმპიური თამაშების 8-გზის მონაწილე, მსოფლიოსა და ევროპის სამგზის ჩემპიონი, ლეგენდარული ტყვიის მსროლელი ნინო სალუქვაძე 2020 წლის ოლიმპიურ თამაშებზე მეცხრედ იასპარეზებს. ამის შესახებ ინფორმაცია საქართველოს ოლიმპიურმა კომიტეტმა გაავრცელა.

განცხადებაში ნათქვამია, რომ ლიცენზიის საკითხი პეკინში მიმდინარე ტყვიის მსროლელთა მსოფლიო თასზე გაირკვა.

პნევმატური პისტოლეტით მსროლელთა შეჯიბრების ფინალში ნინო 578 ქულით შევიდა, იქ კი 176,9 ქულით, საბოლოოდ, მეხუთე შედეგი აჩვენა. რადგან მის წინ მდგომთაგან, ბერძენ ოლიმპიურ და მსოფლიოს ჩემპიონს ანა კორაკაკის, ოლიმპიადის რუს ვიცე-ჩემპიონ ვიტალინა ბაცარაშკინას და უნგრელ ვერონიკა მაიორის უკვე ჰქონდათ ტოკიოს საგზურები, ნინო ავტომატურად მოხვდა ლიცენზიანტთა შორის (კიდევ ერთი ლიცენზია კორეელმა მინჯუნ კიმმა მოიპოვა, ვინც პეკინში მსოფლიო თასი მოიგო).