17 აპრილს ეროვნული ბიბლიოთეკის მოძრაობა ეკვილიბრიუმი გორის მუნიციპალიტეტის სოფელ ბერბუკის დევნილთა დასახლებას ესტუმრა და სოფლის ბიბლიოთეკას წიგნები გადასცა. მოძრაობის მხარდამჭერია გალფი.

სოფელს ბიბლიოთეკა წლების მანძილზე არ ჰქონდა. არასამთავრობო ორგანიზაციამ "გადავარჩინოთ ბავშვები" (Save the Children in Georgia) პროექტის "გენდერული ძალადობის პრევენციისა და რეაგირების გაძლიერება დევნილთა თემებში საქართველოში" ფარგლებში მოიპოვა შენობა, სადაც მოეწყო ბიბლიოთეკა. ეკვილიბრიუმმა ამ ახლადგახსნილი ბიბლიოთეკის ფონდი შეავსო ახალი წიგნებით. ასევე გაიმართა დევნილების შეხვედრა გიორგი კეკელიძესთან.

"ბერბუკის დევნილთა დასახლებაში არ იყო ბიბლიოთეკა და ბავშვებს წიგნების მოპოვებისა და კითხვის არანაირი საშუალება არ ჰქონდათ. წიგნებისთვის ხშირად გორში უწევდათ წასვლა. ამდენად, ეკვილიბრიუმის მხარდაჭერა ძალიან მნიშვნელოვანი იყო მათთვის. ზოგადად, ამ ადამიანებისთვის ნებისმიერი სახის ყურადღება მნიშვნელოვანია", - ამბობს პროექტის კოორდინატორი თამთა უტიაშვილი.