ქართული ოცნების საკრებულოს ყოფილმა დეპუტატმა, ჯაბა ჯიშკარიანმა მოძრაობა დაიცავი საქართველოს შეხვედრაზე განაცხადა, რომ დღევანდელ პოლიტიკურ რეალობაში ხდება ნაციონალური მოძრაობის რეაბილიტაცია და ქართულ ოცნებასთან შერწყმა. მისი თქმით, არავინ უკარგავს ქართული ოცნების თავმჯდომარეს იმას, რომ 2012 წელს "გამარჯვების ლელო დადო", მაგრამ ახლა ცვილებების დროა.

"დღეს იქმნება პლატფორმა, რომელიც დიდ გამარჯვებას მოიტანს", — ასე შეაფასა ჯიშკარიანმა ახალი მოძრაობა.

შეკრებაზე იმყოფება ვატო შაქარიშვილიც, რომელიც ასევე საკრებულოს ქართული ოცნების დეპუტატი იყო. მან აღნიშნა, რომ ქართული ოცნება მედროვე და ჯალათების ოცნებების მიღწევის პარტიად იქცა. ჯიშკარიანმა და შაქარიშვილმა საკრებულო ერთად დატოვეს.

მოძრაობა დაიცავი საქართველოს სათავე ქართული ოცნების ყოფილმა მხარდამჭერმა, დავით მაღრაძემ დააარსა. მაღრაძის განცხადებით, მოძრაობის მიზანია საზოგადოების დაცვა იმ პოლიტიკური ძალებისგან, რომლებიც მათზე არ ზრუნავენ.

შეხვედრას ესწრებიან ქართული ოცნებიდან წამოსული დეპუტატები ეკა ბესელია, გედევან ფოფხაძე, ზვიად კვაჭანტირაძე და სხვები.