თურქეთის პრეზიდენტი, რეჯეპ ტაიპ ერდოღანი სტამბოლში ადგილობრივი არჩევნების შედეგების გაუქმებას ითხოვს, სადაც მერობის ოპოზიციონერმა კანდიდატმა გაიმარჯვა. ინფორმაციას ამის შესახებ Reuters ადგილობრივ მედიაზე დაყრდნობით ავრცელებს.

ერდოღანის თქმით, სტამბოლში საარჩევნო დარღვევა დაფიქსირდა, კერძოდ საარჩევნო ყუთთან საჯარომოხელეებმა უნდა იმუშაონ, ხოლო ზოგიერთ უბანზე აღნიშნული წესი დარღვეული იყო.

წინასწარი შედეგებით, სტამბოლის მერის ადგილობრივ არჩევნებში ოპოზიციონერმა კანდიდატმა, ეკრემ იმამგლუმ გაიმარჯვა. გარდა ამისა, ოპოზიციონერმა კანდიდატმა გაიმარჯვა თურქეთის დედაქალაქ ანკარაში.

თურქეთის ადგილობრივი არჩევნები 31 მარტს გაიმართა. ერდოღანის მმართველმა პარტიამ სტამბოლში ხელახალი არჩევნების ჩატარებისთვის ცენტრალურ საარჩევნო კომისიას 7 აპრილს მიმართა.

უცხოური მედიის ინფორმაციით, არჩევნებზე დაფიქსირდა ძალადობის რამდენიმე შემთხვევა, შეტაკებების დროს ათობით ადამიანმა დაზიანება მიიღო. ორი დამკვირვებელი საარჩევნო უბანზე მოკლეს.