მუსლიმთა კავშირის თავმჯდომარის, ტარიელ ნაკაიძის თქმით, ბათუმში სტალინური რეპრესიების დროს დახვრეტილების უმრავლესობა მუსლიმია. ამ მიზეზით ის მოითხოვს, რომ გადასვენების პროცესში მათი მუსლიმი სასულიერო პირებიც ჩართონ. ამის შესახებ ნაკაიძემ Facebook-ზე დაწერა.

"აღნიშნულიდან გამომდინარე დაუშვებელია მუსლიმი ადამიანების სხვა სარწმუნოების წესებით გადასვენება... კატეგორიულად ვგმობთ და ვეწინააღმდეგებით საპატრიარქოზე გადაცემულ ტერიტორიაზე მათ გადასვენებას", — აღნიშნავს ის.

გუშინ, 5 აპრილს ბათუმისა და ლაზეთის ეკლესიამ ბათუმში, ფრიდონ ხალვაშის ქუჩაზე 1937-1938 წლებში ბოლშევიკური რეპრესიების დროს დახვრეტილი 150-მდე ადამიანის ნეშტის პოვნის შესახებ ინფორმაცია გაავრცელა. მათი ცნობით, ნეშტებს 21 აპრილს, 15:00 საათზე, ბათუმის #3 სამხედრო ბაზის ტერიტორიაზე პატივით დაკრძალავენ.