ევროკომისიამ თურქეთისთვის ვიზების გაუქმების საკითხს მხარი დაუჭირა. კომისიამ მესამე ანგარიში გამოაქვეყნა, რომლის მიხედვით, თურქეთი სავიზო ლიბერალიზაციის მომლოდინე ქვეყანათა სიაში იქნება იმის გათვალისწინებით, რომ მთავრობა დაუყოვნებლივ შეასრულებს დარჩენილ შესასრულებელ კრიტერიუმებს.

როგორც ევროკომისიის მიერ გამოქვეყნებულ ანგარიშში წერია, თურქეთის მთავრობას 72-დან 5 მოთხოვნა ჯერ კიდევ არ შეუსრულებია. მათ შორის არის კორუფციის, პერსონალურ მონაცემთა დაცვის უზრუნველყოფის, ევროპოლთან მოლაპარაკებების დასრულებისა და სასამართლოს პრობლემები. ასევე ის, თუ რამდენად შეესაბამება თურქეთის კანონმდებლობა ევროკავშირის სტანდარტებს ტერორიზმის შესახებ.

გარდა ზემოაღნიშნულისა, ევროკავშირის წევრი 28 სახელმწიფოს გადაწყვეტილება დამოკიდებულია იმაზე, თუ რამდენად შესრულდება ანკარასთან 2016 წლის 18 მარტს გაფორმებული თანამშრომლობა, რაშიც თურქეთიდან ევროპისკენ მიმავალი მიგრანტების ნაკადის შემცირება იგულისხმება. ევროკომისიის ანგარიშში აღნიშნულია, რომ სავიზო ლიბერალიზაციის დაწესებისთვის აღნიშნული შეთანხმებას სხვა კრიტერიუმებთან ერთად გაითვალისწინებენ.

ევროკომისიის დოკუმენტის თანახმად, თურქეთისთვის ვიზების გაუქმება დამოკიდებულია, როგორც დარჩენილი კრიტერიუმების შესრულებაზე, ასევე მარტის შეთანხმების გათვალისწინებაზე.

Reuters-ის ინფორმაციით, თურქეთის საგარეო საქმეთა მინისტრი, მევლუთ ჩავუშოღლუ, აცხადებს, რომ თურქეთმა თითქმის შეასრულა ყველა ის ვალდებულება, რაც ევროკავშირის ქვეყნებთან უვიზო მიმოსვლის დაწესებისთვის არის საჭირო.

3 მაისს, თურქეთის პარლამენტმა საკანონმდებლო დადგენილება მიიღო, რითაც გადაჭრა ყველა ის დაბრკოლება, რაც თურქეთის მოქალაქეებს ევროკავშირში უვიზოდ მოგზაურობისთვის აქამდე უშლიდა ხელს. ასევე, ახალი კანონით, ევროკომისიის მონიტორინგის თანხლებით დარეგულირდება ისიც, თუ რამდენად დისციპლინირებულები არიან თურქი სამართალდამცავები.