ბურჭულაძის ბლოკის წევრი, გიორგი ვაშაძე მოუწოდებს საგამოძიებო უწყებას, პაატა ბურჭულაძესა და ნიკა გვარამიას შორის შემდგარი სატელეფონი საუბრის ჩანაწერის გამავრცელებელი პირის ვინაობა დაასახელოს:

"ხელისუფლებამ დაიწყო ტოტალური შეტევა ჩვენს პოლიტიკურ გაერთიანებაზე, პირადად პაატა ბურჭულაძეზე, რისი მიზეზიც ძალიან მარტივია, ჩვენი მზარდი რეიტინგი. ჩანაწერებს რაც შეეხება, ყველამ იცის, რომ ეს არის უკანონო ჩანაწერები და თუ უნდა ამის გამოძიება სუს-ს, პაატა ბურჭულაძეს კი არ უნდა კითხავდეს, ჯერ გვითხრას საიდან აიტვირთა ეს ყველაფერი".

საკითხს ეხმაურება ასევე ბურჭულაძის მრჩეველი, დავით ჯანდიერი და ამბობს, რომ საგამოძიებო უწყებას არა ბურჭულაძე და გვარამია უნდა დაებარებინა დაკითხვაზე, არამედ გაერკვია, თუ საიდან აიტვირთა აღნიშნული ჩანაწერი:

"ნდობა ზოგადად საგამოძიებო ორგანოების, უსაფრთხოების სამსახურის მიმართ არის ძალიან დაბალი. ჩვენ ვხედავდით მთელი ამ პერიოდის განმავლობაში, რომ არც ერთი ეფექტური შედეგი გამოძიებას ამ ტიპის საქმეებზე არ ჰქონია".

პაატა ბურჭულაძე და ნიკა გვარამია პროკურატურაში დაკითხვაზე მას შემდეგ დაიბარეს, რაც 14 სექტემბერს, აღნიშნულ პირებს შორის სატელეფონო საუბრის აუდიო ჩანაწერი გავრცელდა.

ჩანაწერი ატვირთულია YouTube-ზე, georgia-news.org-ის სახელწოდებით გახსნილ არხზე, რუსული სათაურით: ნიკა გვარამია აკონტროლებს "დამოუკიდებელ" პოლიტიკოსებს (Ника Гварамия контролирует "независимых" политиков).

გვარამია აცხადებს, რომ ნამდვილად ღია ხაზზე ესაუბრა პარტია სახელმწიფო ხალხისთვის ლიდერს პაატა ბურჭულაძეს, რადგან დასამალი არაფერი ჰქონდა. ის თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.