ინტერნეტში გავირუსებულ ვიდეოში ჩანს, რომ რომის პაპი ფრანცისკე მლოცველებს ბეჭედზე კოცნის საშუალებას არ აძლევს და როდესაც ისინი მისკენ იწევენ, ის ხელს უკან წევს.

ვატიკანის პრესსამსახურის წარმომადგენელმა ალესანდრო ჯიზოტიმ განაცხადა, რომ ფრანცისკე კოცნას ჰიგიენის გამო ირიდებდა და როდესაც კეთილისმსურველები მის ბეჭედზე კოცნას ცდილობდნენ, ის ბაქტერიების გავრცელებაზე ნერვიულობდა.

რომის პაპი იმ დღეს უამრავ ადამიანს შეხვდა. მლოცველები გრძელ ზოლში იდგნენ, უახლოვდებოდნენ ფრანცისკეს და მისგან დალოცვის შემდეგ ბეჭედზე კოცნას ცდილობდნენ.

თუმცა, როგორც ვიდეოში ხედავთ, ფრანცისკე ხელს წევს და მათ კოცნას უშლის.

კრიტიკოსები ამბობდნენ, რომ პაპმა უგულებელყო ტრადიცია, როდესაც მორწმუნეებს მისთვის პატივის მიგება სურდათ. თუმცა პრესსპიკერის სიტყვებით, პაპმა კრიტიკა უარყო:

"წმინდა მამამ მითხრა, რომ მისი მოტივაცია მარტივი იყო: ჰიგიენა. მას სურდა, რომ ინფექციები ადამიანებისთვის აერიდებინა და არა საკუთარი თავისთვის".

პაპის ბიშოპის ბეჭედზე კოცნის ტრადიცია საუკუნეებს ითვლის და ის პატივისცემისა და მორჩილების გამოხატულებაა.

ჯიზოტის თქმით, ფრანცისკემ პატარა ჯგუფებთან შეხვედრისას მორწმუნეებს ბეჭედზე ამბორის უფლება მისცა.