თანამედროვე სამყაროში ფოტოაპარატის შესაძლებლობები აღარავის უკვირს, მაგრამ ბევრ ფოტომოყვარულს მაინც აქვს ნოსტალგია ისეთი მწარმოებლების მიმართ, როგორიც ლეიკაა.

ცხადია, კომპანიამ ამის შესახებ იცის, თანაც მსოფლიოში ყველაზე მსხვილი ონლაინ მაღაზიის, Amazon-ის რეიტინგით, ლეიკას ფოტოაპარატები 20 ბესტსელერშიც არ შედის. დღეისათვის Canon და Nikon ლიდერთა სიაში არავის უთმობენ ადგილს.

არადა, ათწლეულების განმავლობაში ლეიკა ერთ-ერთი ყველაზე პოპულარული და მასობრივად გამოყენებადი ფოტოაპარატი იყო.

სხვათა შორის, სწორედ ლეიკას მიერ წარმოებული აპარატით დაეხეტებოდა თბილისის ქუჩებში რობერტ კაპა ჯონ სტაინბეკთან ერთად, როდესაც ამ უკანასკნელმა რუსული დღიურები დაწერა და წიგნი კაპას ფოტოებით გაამდიდრა. მიუხედავად ბაზარზე ფესვგადგმული კომპანიების ჰეგემონობისა, ლეიკა არ უშინდება კონკურენციას და პერიოდულად ახალ პროდუქტებს აცნობს საზოგადოებას, რომელიც საკმაოდ მოთხოვნადი ხდება. ამჯერად, ისინი მორიგი ახალი აპარატის პრეზენტაციას გეგმავენ.

ახალს ვამბობთ, თორემ სინამდვილეში კარგად დავიწყებული ძველის გაცოცხლებაა.

გახსოვთ პოლაროიდის ლეგენდარული აპარატები? დარწმუნებული ვარ, თქვენც მოგეპოვებათ ისეთი ფოტოები გადაღებისთანავე რომ იბეჭდებოდა და ახლა საოჯახო ალბომში ინახება წარწერით: „გიორგი, 2 თვის, 1995 წ.“ თუ ეს მართლაც ასეა, მაშინ გილოცავთ, თქვენ გაქვთ საშუალება ახალი თაობის Instant Camera-თი ისარგებლოთ და საკუთარ შვილსაც უანდერძოთ მსგავსი ფოტოები.

ლეიკამ გადაწყვიტა ძველმოდური ფოტოაპარატები კვლავ მეინსტრიმული გახადოს და შეიმუშავა ახალი თაობის მყისიერი კამერა, რომელიც გადაღებისთანავე დაგიბეჭდავთ ფოტოებს.

ახალი ფოტოაპარატის დიზაინი ოთხკუთხედი და მოსახერხებელი იქნება, რომელიც რამდენიმე ფერში იქნება წარმოდგენილი: თეთრი, ცისფერი და ფორთოხლისფერი. თითოეული მათგანი აღჭურვილი იქნება კომპანიის მიერ სპეციალურად დამზადებული მენიუთი და ისეთი აქსესუარებით, როგორიცაა ჩამოსაკიდი და ქეისი. ფოტოაპარატის ერთ-ერთი თვისება ავტოფოკუსი და რეტრო შესაძლებლობები იქნება. გარდა ამისა, ახალ პროდუქტს ოთხი გადაღების რეჟიმი გააჩნია - „ფართი“ , „სპორტი“ , „სელფი“ და „მაკრო“. მყისიერი ბეჭდვის ფუნქციაზე კომპანიამ ფუჯილიმთან ერთად იმუშავა, რაც შესაძლებელს ხდის ფოტოს ფერად ან შავ-თეთრში ბეჭდვას.

ახალი პროდუქტის, რომლის სახელიც Leica Sofort იქნება, ოფიციალური დაანონსება უახლოეს დღეებში მოხდება, ხოლო მისი ბაზარზე გამოტანა ნოემბრის თვეშია მოსალოდნელი.

ფოტოაპარატის სავარაუდო ფასი €279 იქნება, ხოლო ფირის ღირებულება 12-დან 14 ევრომდე.