გუგლ პლუსი, იგივე G+, ამა წლის 2 აპრილს სამუდამოდ გაქრება ინტერნეტსივრციდან. წარუმატებელი სოციალური ქსელის წაშლის გადაწყვეტილება ტექ გიგანტმა 2018 წლის ოქტომბერში მიიღო.

ამის ერთ-ერთი მიზეზი საიტზე არსებული დეფექტი გახდა, რისი საშუალებითაც, მომხმარებლების პერსონალური ინფორმაციის ნაწილი მოიპარეს.

უსაფრთხოებაში ახალმა გარღვევამ 52,5 მილიონი მომხმარებელი დააზარალა. დეველოპერებისთვის ხელმისაწვდომი გახდა მათი სახელები, იმეილები, ასაკი და პროფესიები. იმის მიუხედავად, დახურული ჰქონდათ თუ არა Google+-ის პროფილი.

Google+ გუგლმა 2011 წელს წარადგინა. მომხმარებლებს პირადი ინფორმაციისა და საიტზე განთავსებული მასალის შესანახად დრო თავდაპირველად 2019 წლის აგვისტომდე ჰქონდათ, თუმცა მოგვიანებით კომპანიამ მისი გაუქმება დააჩქარა.

მარტში, ციფრულმა ბიბლიოთეკამ Internet Archive-მა რედიტზე დაწერა, რომ მომხმარებლების პოსტების შენარჩუნებას არქივში ცდილობდნენ, მანამ, სანამ ისინი სამუდამოდ გაქრებოდნენ ინტერნეტსივრციდან.

გუნდის თქმით, ისინი მხოლოდ იმ პოსტების დაცვას ეცდებიან, რომლებიც ამ დროისთვის მომხმარებლებს საჯაროდ აქვთ. ისინი ასევე მოუწოდებენ Google+-ის მომხმარებლებს, რომ თუ საკუთარი პოსტების დაარქივება არ სურთ, პროფილი წაშალონ.