19 წლის მისურელი თინეიჯერის წინააღმდეგ პოლიციამ გამოძიება დაიწყო, მას შემდეგ, რაც მან აღიარა, რომ თანამშრომლების სასმელებში LSD გაურია.

ბრალდებულის ვინაობა გასაჯაროებული არაა. დაკავების შემდეგ, მან სამართალდამცავებს განუცხადა, რომ მისი ქმედების მიზეზი თანამშრომლების "უარყოფითი ენერგია" იყო:

"ისინი დაძაბულები იყვნენ და განმუხტვა და პოზიტიური განწყობა სჭირდებოდათ".

მისი სიტყვებით, ნარკოტიკული საშუალება ორი კოლეგის წყლის ბოთლში და ერთის ყავაში გაურია.

"[LSD-ს მიღებისას] ადამიანებს გულისცემა უხშირდებათ, იზრდება ტემპერატურა და სისხლის წნევა, რაც კანკალს იწვევს", - ასე აღწერა ადგილობრივმა პოლიციელმა ნარკოტიკის ეფექტი.

თანამშრომლებმა მისი მიღების შემდეგ თავბრუსხვევა იგრძნეს. ისინი დაუყოვნებლივ საავადმყოფოში გადაიყვანეს. ამ დროისთვის მათი მდგომარეობა სტაბილურია.

აშშ-ს ნარკოტიკების მოხმარების ეროვნული ინსტიტუტის (NIDA) მიხედვით, ლიზერგინული მჟავის დიეთილამიდი (LSD) ერთ-ერთი ყველაზე ძლიერი განწყობის შემცვლელი ქიმიური ნივთიერებაა, რომელიც ჰალუცინაციებს იწვევს, ზრდის გულისცემას, აძლიერებს შეგრძნებებს და სენსორულ განცდებს და ადამიანებს დროის აღქმას უცვლის — მის მიერ გამოწვეული თრობა კი სამსახურში ნამდვილად არასასურველია.