რეგიონული განვითარებისა და ინფრასტრუქტურის მინისტრი მაია ცქიტიშვილი პარლამენტში დღეს, 21 მარტს მივა. მაია ცქიტიშვილს პლენარულ სხდომათა დარბაზში იუსტიციის მინისტრის, თეა წულუკიანის შემდეგ მოუსმენენ.

On.ge-ს ინფრასტრუქტურის სამინისტროში განუცხადეს, რომ მაია ცქიტიშვილი ანაკლიის პორტის მშენებლობაზე ისაუბრებს.

ინფრასტრუქტურის მინისტრის პარლამენტში მისვლა თავდაპირველად, კომიტეტის ფორმატში ნაციონალურმა მოძრაობამ მოითხოვა, თუმცა საბოლოოდ, ცქიტიშვილის პლენარულ სხდომაზე მოსმენა გადაწყდა.

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. 2016 წელს ანაკლიის განვითარების კონსორციუმმა და სახელმწიფომ ერთობლივად დაიწყეს ანაკლიის ღრმაწყლოვან პროექტზე მუშაობა. ანაკლიის განვითარების კონსორციუმში შედის თიბისი ჰოლდინგ საქართველო.