ნაციონალური მოძრაობის დეპუტატი თინათინ ბოკუჩავა იუსტიციის მინისტრის სექსისტურ განცხადებას გამოეხმაურა და აღნიშნა, რომ თეა წულუკიანი გენდერულად არასენსიტიურია.

"ეჭვი მაქვს, იმავე შინაარსის კითხვა რომ დაესვა კაც დეპუტატს, ის არ გაამახვილებდა ყურადღებას აღნიშნული დეპუტატის გარეგნობაზე", — განაცხადა ბოკუჩავამ რუსთავი 2-თან საუბრისას.

"ქალბატონი თინა ძალიან ბევრ უსაფუძვლო განცხადებას აკეთებს და ამავე დროს, ის ძალიან ლამაზი ქალია", — ამ შინაარსის სექსისტური განცხადებით მოიხსენია წულუკიანმა ბოკუჩავა, რომელმაც თქვა, რომ მინისტრი გახმაურებულ საქმეებზე ინფორმაციას ფლობს, რითიც ქართულ ოცნების თავმჯდომარეს, ბიძინა ივანიშვილს აშანტაჟებს.

"ეს არის მისი ინტერპრეტაციები და ნუ, მას სჭირდება, რომ რაღაცნაირად პოლიტიკური განცხადებები აკეთოს და აკეთებს ამ განცხადებებს. ჩემგან რა არის მოთხოვნილი, რომ მის ილუზიებზე ვაკეთო კომენტარები?!" — უთხრა წულუკიანმა ჟურნალისტებს.

ბოკუჩავამ პარლამენტში სიტყვით გამოსვლისას თქვა, რომ თეა წულუკიანი გახმაურებულ საქმეებზე, მათ შორის აფგან მუხთარლის გატაცების, ეროსი კიწმარიშვილის გარდაცვალების, ვანო მერაბიშვილის საკნიდან გაყვანისა და რუსთავი 2-ის საქმეებზე გარკვეულ ინფორმაციებს ფლობს.