სტივენ მეკიერსი 72 წლის ბრიტანელი პენსიონერია, რომელსაც საკმაოდ საფუძვლიანი ეჭვი გაუჩნდა, რომ სახლში მოჩვენება ჰყავდა.

საქმე ის არის, რომ კაცს ყოველ დღე საკუთარი ფარეხი, სადაც ათას წვრილმანს ინახავს, დალაგებული, ნივთები კი გადაადგილებული ხვდებოდა.

სტივენმა ჩათვალა, რომ ეს საკმაოდ უცნაური გარემოება იყო და გადაწყვიტა ის კეთილი არსება გამოეაშკარავებინა, რომელიც ფარეხში მიმოფანტულ ნივთებს, ასე მონდომებით აწესრიგებდა.

ფოტო: SWNS TV

კაცმა მეზობლის დახმარებით ფარეხში ფარული კამერა დააყენა, რომელიც მთელი ღამის განმავლობაში განუწყვეტლივ იღებდა და როგორც იქნა სიმართლე გაირკვა — "მოჩვენება", რომელიც პენსიონერის ფარეხს ყოველღამე ალაგებდა, თაგვი აღმოჩნდა.

ნახეთ ვიდეო, რომელიც ძალიან საქმიან პატარა თაგვს ასახავს:

"ჩემს ფარეხში დატრიალებულ მოვლენებს ვერაფრით ვხსნიდი. ისიც კი ვიფიქრე, რომ ამას მოჩვენება აკეთებდა. ვიდეოს ნახვის შემდეგ კი აღფრთოვანებული დავრჩი, გასაოცარი თაგვია", — ამბობს სტივენი.

ფოტო: SWNS TV

ჩვენ კი დიდი იმედი გვაქვს, რომ სრულიად უანგაროდ გაწეული ამხელა სამსახურისთვის, ეს უსაყვარლესი თაგვი აუცილებლად მიიღებს ჯილდოს გემრიელი სასუსნაოს სახით.