ახალ ზელანდიაში მომხდარი ტერაქტიდან 24 საათში Facebook-ის ადმინისტრაციამ ტერაქტის ამსახველი 1,5 მილიონი ვიდეო წაშალა. ინფორმაციას ამის შესახებ გამოცემა Verge ავრცელებს.

ქსელის ადმინისტრაციამ იგივე შინაარსის განცხადება გაავრცელა Twitter-ზე. პოსტში ნათქვამია, რომ წაშლილი 1,5 მილიონი მასალისგან 1,2 მილიონი ატვირთვის მომენტში დაიბლოკა. სოციალური ქსელის ადმინისტრაცია ასევე ბლოკავს ამავე ტერაქტის ამსახველ დამონტაჟებულ და მოჭრილ ვერსიასაც.

სოციალურ ქსელებს ტერაქტის ამსახველი ვიდეოს დაბლოკვისკენ მოუწოდა ბრიტანეთის ხელისუფლებამაც. თავდასხმის ვიდეო პირდაპირი ჩართვით გადაიცემოდა Facebook-ზე. მალევე ვიდეო Youtube-ზე და Reddit-ზეც გავრცელდა. არსებობს ვერსია, რომ თავდასხმა დასაწყისიდანვე ხალხის ყურადღების მიპყრობასა და სოციალურ ქსელებში გავრცელებაზე იყო გათვლილი.

ტერორისტული აქტი 15 მარტს ახალი ზელანდიის ქალაქ კრაისტჩერჩში არსებული ორ მეჩეთში მოხდა. შეტევის ერთადერთ ორგანიზატორად ამ დროისთვის 28 წლის ბრენტონ ტარანტი სახელდება. შეტევის შედეგად დაიღუპა 50 და სხვადასხვა სახის დაზიანებები მიიღო 20-ზე მეტმა ადამიანმა.