ავსტრალიელ სენატორ, ფრეიზერ ენინგს ჟურნალისტებთან საუბრისას მოზარდმა კვერცხი თავზე დაახალა, რის შემდეგაც სენატორმა მოზარდს ხელი გაარტყა.

ენინგმა ერთ-ერთი ინტერვიუს დროს ახალ ზელანდიაში თავდასხმაზე ისაუბრა და თქვა, რომ 49 ადამიანის სიკვდილი "მუსლიმი ფანატიკოსების" მიგრაციის შედეგია. ამ სიტყვების გამო სენატორი გააკრიტიკეს ჟურნალისტებმა და პოლიტიკოსებმა, მათ შორის ავსტრალიის პრემიერ-მინისტრმა, სკოტ მორისონმა.

განცხადებების გაკეთებიდან მეორე დღეს, ჟურნალისტებთან საუბრისას ენინგთან მოზარდი მივიდა და კვერცხი დაახალა. სენატორი გაბრუნდა და ბიჭს ხელი რამდენჯერმე დაარტყა. პოლიციამ სენატორზე თავდამსხმელი ბიჭი დააკავა, თუმცა მალევე გაუშვა.

15 მარტს შეიარაღებული პირები ახალი ზელანდიის ქალაქ კრაისტჩერჩში ორ მეჩეთს დაესხნენ თავს. თავდასხმის შედეგად 49 ადამიანი დაიღუპა, ხოლო 50-მდე დაშავდა.