წვევამდელს, ქაზიმ გახრამანოვს, რომელმაც სხვა ჯარისკაცები ძალადობასა ფულის გამოძალვაში დაადანაშაულა, სხვა ბაზაზე გადაიყვანენ. როგორც თავდაცვის სამინისტროში On.ge-ს უთხრეს, სხვა ბაზაზე გადაყვანას ოჯახის ითხოვდა.

გახრამანოვმა სამხედროების მხრიდან ძალადობაზე 11 მარტს რუსთავი 2-თან ისაუბრა. მისი თქმით, მეთაურის თანდასწრებით ფული მოსთხოვეს, უარის შემდეგ კი სცემეს. წვევამდელმა აღნიშნა, რომ ცემის შემდეგ ექიმთან მივიდა, თუმცა არავინ ჰკითხა, რატომ ჰქონდა თვალი ჩალურჯებული.

"პარასკევს [2019 წლის 8 მარტს], ღამის ორ საათზე დაგვიძახეს და ფული მოგვთხოვეს, ეს ყველაფერი სერჟანტ უნდილაძის თვალწინ ხდებოდა. ფულის მიცემაზე უარი ვთქვი და სასტიკად გამისწორდნენ, მცემეს. მეორე დღეს ექიმთან მივედი და არც კი უკითხავს თვალი რატომ მქონდა ჩალურჯებული", — ამბობს წვევამდელი.

ცემისა და გამოძალვის საქმეზე სამხედრო პოლიციამ გამოძიება უკვე დაიწყო. მათი განცხადებით, სამხედრო პოლიციამ წვევამდელის მიერ დასახელებული სერჟანტი, დაცვის უზრუნველყოფის ასეულის მორიგე უკვე გამოკითხა და სერჟანტი წვევამდელზე რაიმე სახის ძალადობას კატეგორიულად უარყოფს.

გამოძიება სისხლის სამართლის კოდექსის ორი მუხლით — 386-ე მუხლის პირველი ნაწილითა და 181-ე მუხლის პირველი ნაწილით დაიწყო, რაც ურთიერთდაუქვემდებარებელ სამხედრო მოსამსახურეებს შორის დამოკიდებულების წესის დარღვევასა და ფულის გამოძალვას გულისხმობს.