აფხაზეთის დე ფაქტო საგარეო საქმეთა მინისტრი დაურ კოვე ამტკიცებს, რომ ოკუპირებულ ტერიტორიაზე დაკავებულმა ირაკლი კვარაცხელიამ დაკითხვის ოთახში მოიკლა თავი. ამის შესახებ მან JAMnews-თან ისაუბრა.

"კვარაცხელია რუსმა მესაზღვრეებმა დააკავეს საზღვრის უკანონო გადაკვეთისთვის. ეს მოხდა 12 მარტს, 16 საათზე და 55 წუთზე. კვარაცხელია სოფელ ნაბაკევში გადაიყვანეს. ის დატოვეს ოთახში, რათა მას განმარტებითი ბარათი დაეწერა. თუმცა, რამდენიმე ხანში იგი ამ ოთახში ჩამომხრჩვალი იპოვეს. ეს ყველაფერი ერთი საათის განმავლობაში მოხდა", — უთხრა კოვემ JAMnews-ის სოხუმელ კორესპონდენტს.

სახელმწიფო უსაფრთხოების სამსახურმა 12 მარტს მიიღო ინფორმაცია, რომ გალის რაიონში დაკავებულმა საქართველოს მოქალაქემ, ირაკლი კვარაცხელიამ თავი მოიკლა. შემთხვევას გამოეხმაურა შერიგებისა და სამოქალაქო თანასწორობის საკითხებში სახელმწიფო მინისტრი, ქეთევან ციხელაშვილი. მისი თქმით, "სპეკულაციებს არ დაიწყებს", რადგან სხვადასხვა არხების მეშვეობით, გარდაცვალების გარემოებები დგინდება.

გარდაცვლილის მეგობარი ამბობს, რომ მისი აზრით, ირაკლი კვარაცხელია რუსმა სამხედროებმა ცემით მოკლეს. იგი სოფელ თაგილონისა და ნაბაკევის საოკუპაციო ხაზთან, გასულ კვირას დააკავეს. კვარაცხელიას მეგობარი იხსენებს, რომ ადგილზე შელაპარაკება მოხდა.

ოკუპირებული რეგიონის დე ფაქტო უშიშროების სამსახურის განცხადებით, 1990 წელს დაბადებული ირაკლი კვარაცხელია 2019 წლის 10 მარტს ე.წ. საზღვრის უკანონო კვეთის ბრალდებით დააკავეს. მათივე განცხადებით, პროცესუალური დოკუმენტების გასაფორმებლად დაკავებული რუსეთის სასაზღვრო სამსახურის განყოფილებაში გადაიყვანეს.

სამსახურის აცხადებს, რომ კვარაცხელიამ თავი ჩამოიხრჩო და სამედიცინო დახმარების მიუხედავად მისი დახმარება ვერ მოხერხდა. როგორც აცხადებენ, ექსპერტიზამ ძალადობის კვალი ვერ იპოვა.