სასამართლომ ბავშვებზე სექსუალური ძალადობის დაფარვაში ბრალდებული ფრანგი კარდინალი ფილიპ ბარბარენი დამნაშავედ ცნო და ექვსთვიანი პირობითი მიუსაჯა. ბარბარენი დამნაშავედ სცნეს იმაში, რომ 1980-90-იან წლებში მან სასულიერო პირების მხრიდან ბავშვებზე ძალადობის შესახებ ინფორმაცია დამალა.

როგორც BBC წერს, სასულიერო პირი დანაშაულს არ აღიარებს და გადაწყვეტილების გასაჩივრებას აპირებს. თვითონ ბარბარენი, რომელიც ლიონის არქიეპისკოპოსია, განაჩენის გამოცხადებას არ ესწრებოდა. თუმცა სასამართლოს მიმდინარეობისას მან განაცხადა:

"ვერ ვხედავ რაში ვარ დამნაშავე. არასდროს მიცდია და არ დამიფარავს ეს საზარელი ფაქტი".

ბრალდებები სასულიერო პირის, ბერნარ პრეინატანის საქმეს ეხება, რომელიც ახლა 73 წლის არის. წლების განმავლობაში ის ლიონში ბოისკაუტების ჯგუფებს ხელმძღვანელობდა. ათობით კაცმა კი განაცხადა, რომ ბავშვობაში სასულიერო პირის მხრიდან სექსუალური ძალადობის მსხვერპლი გახდა.

პრეინატანის ადვოკატი აცხადებს, რომ სასულიერო პირი დანაშაულს აღიარებს, მაგრამ აღნიშნავს, რომ დანაშაულს ხანდაზმულობის ვადა გაუვიდა. ამავე დროს, პროკურატურა ამტკიცებს, რომ რამდენიმე ეპიზოდებზე შესაძლოა, პრეინატანს ბრალი მაინც წარუდგინონ.

პრეინატანის ძალადობის რამდენიმე მსხვერპლმა უმოქმედობის გამო კარდინალ ბარბარენისა და სხვების წინააღმდეგ სასამართლოში საჩივარი შეიტანა.

ამავე თემაზე: