რომის ეკლესიის კარდინალი ჯორჯ პელი ავსტრალიაში სექსუალურ ძალადობაში დამნაშავედ სცნეს. სასამართლოს მტკიცებით, 1996 წელს კარდინალმა მელბურნის ტაძრის ოთახებში მგალობელი გუნდის ორ არასრულწლოვან ბიჭზე იძალადა. სასულიერო პირი დანაშაულს არ აღიარებს.

განაჩენი სასამართლომ 2018 წლის დეკემბერში გამოიტანა, თუმცა იურიდიული მიზეზების გამო ახლა გასაჯაროვდა. განაჩენი ოთხშაბათს, 27 თებერვალს უნდა წაეკითხათ. დაცვის მხარე აპირებს, განაჩენი გაასაჩივროს. ისინი ამბობენ, რომ ბრალდება უსაფუძვლოა და დაზარალებულების ფანტაზიის ნაყოფია.

ვატიკანის მიერ დანიშნული 77 წლის კარდინალი საეკლესიო იერარქიის ერთ-ერთი გავლენიანი პირია. როგორც BBC წერს, რომის კათოლიკურ ეკლესიაში მას რიგით მესამეს უწოდებენ.

კარდინალი საქმეზე სასამართლო სხდომები ორჯერ გაიმართა, რადგან ნაფიცმსაჯულთა პირველმა შემადგენლობამ გადაწყვეტილების მიღება ვერ შეძლო. მეორე სასამართლო კოლეგიამ კი გამამტყუნებელი განაჩენი ერთსულოვნად გამოიტანა.

სასამართლოს გადაწყვეტილებაში წერია, რომ ჯორჯ პელი 1996 წელს მელბურნის ტაძარში არქიეპისკოპოსად მსახურობდა. მათივე თქმით, სასულიერო პირმა 16 წლამდე ორი ბიჭი ზიარებისთვის განკუთვნილი ღვინოს დალევაში დაადანაშაულა, შემდეგ კი უხამსი ქმედებების გაკეთება აიძულა. სხდომაზე ჩვენება მისცა ერთ-ერთმა დაზარალებულმა, მეორე კი უკვე ცოცხალი არ არის.