თბილისის მერი, კახა კალაძე "ღიმილისმომგვრელს" უწოდებს იმ წერილის შინაარსს, რაც თიბისის დამფუძნებელმა მამუკა ხაზარაძემ პროკურატურას მტკიცებულებად გადასცა, როგორც "გიორგი გახარიას მუქარა".

მისივე თქმით, მსგავსი წერილის შედგენა, ნებისმიერ ადამიანს შეუძლია. კალაძე ამბობს, რომ გაუგებარია, რა შუაშია მედია და იუმორით ეხმაურება დოკუმენტში დასახელებულ მედიასაშუალებებს:

"საერთოდ რა შუაშია TV პირველი გაუგებარია, რა შუაშია არტარეა. ალბათ მომავალში ენკი-ბენკიზეც იქნება საუბარი".

საქართველოს მთავარმა პროკურატურამ ხაზარაძის მიერ მტკიცებულებად გადაცემული დოკუმენტი გუშინ 6 თებერვალს გაასაჯაროვა. წერილში საუბარია იმაზე, რომ ტელეკომპანია პირველს იმედის მსგავსი სარედაქციო პოლიტიკა უნდა ჰქონდეს.

"უახლოეს 5 დღეში TV1 უნდა დაჯდეს TV იმედის ტრენდზე, გადავიდეს მაუწყებლობის საგანგებო რეჟიმზე (ეს უნდა დავინახოთ არხის სარედაქციო პოლიტიკიდან)", — ნათქვამია წერილში.

4 მარტს პარლამენტში მამუკა ხაზარაძემ განაცხადა, რომ არჩევნების წინ შინაგან საქმეთა მინისტრის, გიორგი გახარიასგან მუქარის წერილი მიიღო, რომლის მიხედვითაც, მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. მისი თქმით, გამოძების ნაცვლად, პასუხად მიიღო ბრიფინგი და ბრალდება ფულის გათეთრების საქმეზე. თუმცა, პროკურატურაში ხაზარაძის ბრალდება უარყვეს და განაცხადეს, რომ დაკითხვისას ბიზნესმენმა მუქარა მხოლოდ ეროვნულ ბანკთან მიმართებაში გამოიყენა. უწყებაში განმარტავენ, რომ საუბარია ეროვნული ბანკის ოფიციალურ წერილზე, რომელშიც მამუკა ხაზარაძისა და ბადრი ჯაფარიძის გადადგომის მოთხოვნაზე იყო საუბარი.

თავად შინაგან საქმეთა მინისტრმა ბრალდებები უარყო და განაცხადა, რომ ეს არის "პრივილეგირებული ბიზნესმენის მცდელობა, პარლამენტიდან ჭორაობით იმუნიტეტი მოიპოვოს". მისივე თქმით, საკუთარ სიტყვებზე პასუხის გაცემა ყველას მოუწევდა.

გაიგეთ მეტი: რა ვიცით თიბისის საქმეზე — ყველაფერი მოკლედ