მოქალაქე მარიამ აბულაძე ფეისბუქზე წერს, რომ რამდენიმე თვის წინ სასულიერო პირმა მობილური წაართვა და პროკურატურამ ის დაზარალებულად არ სცნო. როგორც მან On.ge-ს უთხრა, გამოძიება სისხლის სამართლის კოდექსის 178-ე მუხლის მეორე ნაწილის "ა" ქვეპუნქტით დაიწყო, რაც გულისხმობს ძარცვას, რამაც მნიშვნელოვანი ზიანი გამოიწვია.

აბულაძე პროკურატურისგან მიღებულ წერილს ასაჯაროებს, სადაც უწყების პოზიციაა დაფიქსირებული. პროკურატურა განმარტავს, რომ ამ ეტაპზე გამოძიებამ ვერ დაადგინა, რომ მარიამ აბულაძეს რაიმე სახის ზიანი მიადგა.

ფოტო: მარიამ აბულაძე / Faceboo

აბულაძე პოსტში იხსენებს, რომ მასსა და სასულიერო პირს შორის კონფლიქტი 30 ოქტომბერს მას შემდეგ დაიწყო, რაც მან მისი მანქანის გადაღება სცადა. როგორც ის ამბობს, სასულიერო პირი გზაჯვარედინზე მანქანის მოტრიალებას ცდილობდა და გზა გადაკეტილი ჰქონდა:

"ეს მამაო გადმოხტა წამებში მანქანიდან, მოვარდა ჩემს მანქანასთან, შემოიჭრა ჩემს ავტომობილში, წამართვა კუთვნილი მობილური. მომაძახა, რომ "გამომყევი ახლა მე შენ გასწავლი ჭკუასო", "მიგიყვან იქ სადაც საჭიროაო", შემაგინა და ჩემი მობილური თავისი მანქანით წაიღო", — წერს მარიამ აბულაძე.

მისივე თქმით, მან ეს ყველაფერი ტელეფონით გადაიღო და ვიდეომასალა მობილურთან ერთად საქმეში დევს.

ინციდენტთან და გამოძიებასთან დაკავშირებით On.ge პროკურატურას დაუკავშირდა და ინფორმაციას მიღებისთანავე მოგაწოდებთ.