"დაახლოებით ორი თვის წინ მეგობარმა მკითხა, მქონდა თუ არა სხვა ანგარიში, მაგრამ მაშინ ეს სერიოზულად არ აღვიქვი. რას წარმოვიდგენდი ჩემს ფოტოებს იმისთვის თუ იყენებდნენ, რომ სხვა ადამიანების დისკრედიტაცია დამაჯერებლად გამოსვლოდათ. გუშინ კი იგივე კითხვა არაერთმა ადამიანმა დამისვა", — ასე იხსენებს On.ge-სთან მომხდარს კარო მანუკიანი, რომლის ფოტოებითაც ფეისბუქტროლის Avtandil Kereselidze-ის ანგარიშზე იყო შექმნილი

იმის დასამტკიცებლად, რომ მანუკიანი რეალური პერსონაა და ამ ანგარიშის უკანაც ტროლი არ დგას On.ge მას ვიდეოზარით ესაუბრა.

ფოტო: კადრი ტელეფონის ეკრანიდან

მანუკიანი ამბობს, რომ წარმოდგენაც არ აქვს იმ გვერდებისა და ჯგუფების შესახებ, რომელსაც ეს პირი მართავდა და არც იმ საკითხების შესახებაა ინფორმირებული, რომელზეც ტროლი აქტიურად წერდა.

"როცა გავიგე ფეისბუქის ადმინისტრაციას მივწერე. ვაცნობე, რომ ჩემს ფოტოებს იყენებდა. მალევე დაბლოკეს. თუ ისევ აღადგენს ხელახლა ვუჩივლებ. სხვა ბერკეტი ამ სიტუაციიდან თავის დასაღწევად არ ვიცი. ხალხმა უნდა დაიჯეროს, რომ რეალური პერსონა მე ვარ და არა Avtandil Kereselidze", — აცხადებს მანუკიანი.

მედიის განვითარების ფონდის კვლევის თანახმად Facebook-გვერდებს, რომლებიც მამუკა ხაზარაძის დისკრედიტაციას ეწეოდა, სამთავრობო ტროლი, Avtandil Kereselidze მართავდა. კვლევამ დაადგინა, რომ ტროლს ოთხი გვერდი: იყავი და გაგეკეთებინა, პოლიტიკური სანაგვე, ჩვენთვის არავინაა, მოვკვდები საქართველოსთვის ეკუთვნოდა.

მას შემდეგ, რაც მედიის განვითარების ფონდის კვლევაზე დაყრდნობით On.ge-მ და Tabula-მ მასალა მოამზადეს, Avtandil Kereselidze-ის ანგარიშზე გამოჩნდა პოსტი ბოდიშის მოხდის მოთხოვნით. კერესელიძის ანგარიში ამტკიცებდა, რომ ის რეალური ადამიანია და წერდა, რომ ცილისწამებისთვის სასამართლოში იჩივლებდა. თუმცა, ორ საათში მისი ანგარიში ფეისბუქიდან გაქრა.

ამავე თემაზე: