იუსტიციის უმაღლესი საბჭოს არამოსამართლე წევრი, ნაზი ჯანეზაშვილი ამბობს, რომ თუ მოსამართლეები მიხეილ ჩინჩალაძე და ლევან მურუსიძე უარს იტყვიან მოსამართლეობაზე, ისიც დატოვებს თანამდებობას. ამის შესახებ მან პარლამენტარის, თამარ ჩუგოშვილის ინიციატივის გაჟღერების შემდეგ ისაუბრა.

ჯანეზაშვილი განმარტავს, რომ ამ შეთავაზებით მოქმედ მოსამართლეებს შეუძლიათ დარჩნენ იუსტიციის უმაღლეს საბჭოში წევრებად, თუმცა უარი უნდა თქვან მოსამართლეობაზე.

"თუკი ჩინჩალაძე წავა კლანთან ერთად მე დავწერ განცხადებას და წავალ", — ამბობს ჯანეზაშვილი.

მისი განმარტებით, აუცილებელი არაა საბჭოს ყველა წევრმა დატოვოს თანამდებობა, მთავარია, რომ ღირსეული ადამიანები დარჩნენ.

"რომ არა იუსტიციის საბჭოს არამოსამართლე წევრები, საბჭო ამ [მოსამართეთა დანიშვნაზე] გადაწყვეტილებას ვერ მიიღებდა... წევრთან დაკავშირებით ინდივიდუალურად იყოს გადაწყვეტილება მიღებული", — ამბობს ჯანეზაშვილი.

ის გამოეხმაურა პარლამენტის წევრის, თამარ ჩუგოშვილის ინიციატივას პარლამენტის მიერ დანიშნული არამოსამართლე წევრების გამოთხოვასთან დაკავშირებით. მისი თქმით, იუსტიციის საბჭოს წევრებისთვის უფლებამოსილების შეჩერება მხოლოდ საქმიანობის არაჯეროვნად შესრულების შემთხვევაში შეიძლება, კანონმდებლობა კი ბუნდოვანია და არ განსაზღვრავს რას გულისხმობს საქმიანობის არაჯეროვნად შესრულებაში.

ჩუგოშვილის ინიციატივით, თუ იუსტიციის უმაღლესი საბჭოს წევრები გააგრძელებენ მოსამართლეობის კანდიდატების უვადოდ დანიშვნას, მაშინ პარლამენტის მიერ წარდგენილი ხუთივე კანდიდატს გამოითხოვენ. პარლამენტის მიერ დანიშნული ერთ-ერთი წევრი სწორედ ნაზი ჯანეზაშვილია. მასთან დაკავშირებით ჩუგშვილმა თქვა, რომ "მისი იუსტიციის საბჭოში ყოფნის როლი ყველაზე კარგად ესმის".