პარლამენტის ვიცე-სპიკერი თამარ ჩუგოშვილი "ბოკერია-სააკაშვილის რეჟიმის" დანაშაულებრივად გამოცხადების რეზოლუციას გამოეხმაურა. მისი თქმით, წინა ხელისუფლების დანაშაულის მიუხედავად, მთავარი ოპოზიციური პარტიების "ალაგმვა" სწორი არაა.

"მე ისინი არ მომწონს და მიუღებელია ის, რასაც ისინი აკეთებდნენ, მაგრამ ისინი არიან ოპოზიცია, მთავარი ოპოზიციური ძალა და არიან ჩვენი კონკურენტები", — აღნიშნა ჩუგოშვილმა.

21 თებერვალს პარლამენტმა პატრიოტთა ალიანსის რეზოლუცია ჩააგდო. დოკუმენტს მხარი 45-მა დეპუტატმა დაუჭირა, რაც რეზოლუციის მისაღებად საკმარისი არ იყო. წინააღმდეგ კი 16 დეპუტატი იყო.

პროექტის განმარტებით ბარათში რეზოლუციის მიღების მიზნად განისაზღვრა საქართველოში სამართლიანობის აღდგენა, დანაშაულებრივი ქმედებების გამოძიება, გამოაშკარავება და დამნაშავეების დასჯა.

"ექვსი თვის ვადაში პასუხისმგებლობა დაეკისროს სააკაშვილ-ბოკერიას დანაშაულებრივი რეჟიმის ყველა მთავარ ფიგურანტს, სათანადოდ დაისაჯონ ყველა რეზონანსული საქმის დამნაშავე პირები. საქართველოს პარლამენტმა უზრუნველყოს ამ რეზოლუციის აღსრულების ოპერატიული კონტროლი", — ნათქვამია რეზოლუციის განმარტებით ბარათში.