ქართული ოცნება - დემოკრატიული საქართველოს საგარეო ურთიერთობების, უსაფრთხოებისა და თავდაცვის პროგრამის მიხედვით, ქართული ოცნება ამომრჩეველს სთავაზობს რუსეთის ფედერაციასთან კონფლიქტების მშვიდობიან დარეგულირებას.

პროგრამაში საუბარია რუსეთთან ურთიერთობის ქრონიკაზე, გადადგმულ ნაბიჯებზე და სამომავლო გეგმებზე:

"საქართველოსთან მიმართებით რუსეთი აგრძელებს საერთაშორისო სამართლის ძირითადი პრინციპებისა და 2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების უგულვებელყოფას, მიზანმიმართულად ახორციელებს უკანონო ქმედებას საქართველოს ოკუპირებულ რეგიონებში, რაც გულისხმობს სოხუმსა და ცხინვალთან ინტეგრაციის შესახებ ე.წ. ხელშეკრულებების გაფორმებას, ოკუპირებული ტერიტორიების შემდგომ მილიტარიზაციას, საოკუპაციო ხაზის გასწვრივ მავთულხლართების, ხელოვნური ბარიერების და ე.წ. საზღვრის აღმნიშვნელი ბანერების ინსტალაციას. მასშტაბური ხასიათი აქვს ადგილობრივი ქართული მოსახლეობის უფლებების უხეშ ხელყოფას. ბოლო ოთხი წლის განმავლობაში საქართველო-რუსეთის ურთიერთობათა ყველაზე რთული საკითხები რეგულარულად განიხილებოდა ჟენევის საერთაშორისო კონსულტაციების ფორმატში. ინციდენტების პრევენციისა და მათზე რეაგირების მექანიზმების ამოქმედებამ საშუალება მოგვცა შეგვემცირებინა, წინა წლებთან შედარებით, ტრაგიკული შემთხვევები საოკუპაციო ხაზის მიმდებარე რეგიონებში."

პროგრამის მიხედვით, ოცნების პოლიტიკის მთავარი მიზანია დიალოგის ფორმატში სასურველი შედეგის მიღწევა - საქართველოს დეოკუპაცია და გამთლიანება, მისი მდგრადი განვითარებისათვის შესაბამისი საგარეო პირობების შექმნა:

"რუსეთის მიმართ პრაგმატულმა პოლიტიკამ, ორმხრივი დიალოგის დაწყებამ და წარმოებამ, ჩვენ დასავლელ პარტნიორებთან აქტიურმა თანამშრომლობამ მნიშვნელოვნად შეამცირა შეიარაღებული კონფლიქტის განახლების ალბათობა რაც ქვეყნის, ასევე შიდაპოლიტიკური, რეგიონული უსაფრთხოებისა და სტაბილურობის განმტკიცების ერთ-ერთი უმნიშვნელოვანესი ფაქტორია. მოსკოვთან ორმხრივი დიალოგის შედეგად, გადაიდგა მნიშვნელოვანი ნაბიჯები სავაჭრო-ეკონომიკურ, სატრანსპორტო და ჰუმანიტარულ სფეროებში. 2013-2016 წლებში, საქართველოს ექსპორტმა რუსეთში ასობით მილიონი დოლარი შეადგინა. მნიშვნელოვანი მოგება ნახეს ქართულმა სატრანსპორტო კომპანიებმა. ორმხრივი დიალოგის ფორმატში, შევძელით ჩვენი მოქალაქეების გათავისუფლება, რომლებიც რუსეთში იხდიდნენ მრავალწლიან სასჯელს ჯაშუშობის ბრალდებით. 2016 წელს, რუსეთის ფედერაციის მხრიდან საგრძნობლად გამარტივდა სავიზო მოთხოვნები საქართველოს მოქალაქეებისათვის. გაიზარდა საქართველოში რუსეთიდან ტურისტთა რაოდენობა -2016 წელი ამ თვალსაზრისით რეკორდული იქნება. 2014 წლის ივლისში, საქართველოს სასარგებლოდ მიღებულ იქნა სტრასბურგის ადამიანის უფლებათა ევროპული სასამართლოს გადაწყვეტილება საქმეზე „საქართველო რუსეთის წინააღმდეგ“, რომელიც ეხება 2006-07 წლებში რუსეთის ფედერაციის მიერ საქართველოს მოქალაქეთა ეთნიკური ნიშნით დეპორტაციას. დიალოგი რუსეთთან და პრაგმატული ურთიერთობა ამა თუ იმ სფეროში არ გულისხმობს რაიმე კომპრომისს ქვეყნის სასიცოცხლო ინტერესების ხარჯზე."

ქართული ოცნება მოსახლეობას ჰპირდება, რომ კვლავ გააგრძელებს რუსეთთან მიმართებაში პრაგმატულ პოლიტიკა.