4 Percent Challenge - ასე ჰქვია ახალ გამოწვევას, რომელში მონაწილეობასაც აქტიურად იღებენ ჰოლივუდის მსახიობები.

ყველაფერი კი სანდენსის კინოფესტივალზე დაიწყო, როდესაც მსახიობმა ტესა ტომფსონმა კინოინდუსტრიაში ქალი რეჟისორების ნაკლებობაზე ისაუბრა და თქვა, რომ დიდი კინოსტუდიების ფილმებში, რომლებიც 2019-2020 წლებში გამოდის, მხოლოდ 4 პროცენტია ქალი.

სწორედ ამიტომ, ტესამ ახალ გამოწვევას ჩაყარა საფუძველი და თქვა, რომ მომდევნო 18 თვის განმავლობაში ის მხოლოდ ქალი რეჟისორების პროექტებს დასთანხმდება.

"გამომდინარე იქიდან, რომ წელს დაგეგმილი ასი ფილმიდან მხოლოდ 4 პროცენტის რეჟისორი არის ქალი, გადავწყვიტე მომდევნო 18 თვე მხოლოდ იმ პროექტებს დავთანხმდე, რომელსაც ქალი გადაიღებს. იმედი მაქვს სხვა მსახიობებიც იგივეს გააკეთებენ", - თქვა სიტყვით გამოსვლისას ტესამ.

ტომფსონის სიტყვით გამოსვლა მალევე გახდა ვირუსული და მის გამოწვევას სხვა მსახიობებიც შეურთდნენ.

მათ შორის არის არმი ჰამერი, სიუზან სარანდონი, ჯენიფერ ლოპესი, ემი შუმერი, ბრი ლარსონი, რიზ უიზერსპუნი, ბრაის დალას ჰოვარდი, ევა ლონგორია და კონსტანს ვუ, რომლებმაც თქვეს, რომ ტესას მსგავსად, მომდევნო 18 თვის განმავლობაში ისინიც მხოლოდ იმ ფილმებს დასთანხმდებიან, რომლის რეჟისორიც ქალი იქნება.

რაც შეეხება 2019-2020 წლებში დაგეგმილ პროექტებს, საერთო ჯამში მხოლოდ 24 ფილმს ჰყავს ქალი რეჟისორი. მათ შორის კი არიან:

  • Charlie’s Angels, რეჟისორი ელიზაბეტ ბენკსი
  • Little Women, რეჟისორი გრეტა გერვიგი
  • Barbie, რეჟისორი ალათეა ჯონსი
  • Captain Marvel, თანა-რეჟისორი ანა ბოდენი
  • Mulan, რეჟისორი ნიკი კარო
  • Wonder Woman 1984, რეჟისორი პეტი ჯენკინსი და ა.შ.