ბიძინა ივანიშვილმა ტელეკომპანია GDS-ის ეთერში, რეგიონულ მედიასთან შეხვედრისას ქართული ოცნებისა და რესპუბლიკური პარტიის თანამშრომლობაზე ისაუბრა. მან აღნიშნა რომ მთელი ოთხი წლის განმავლობაში, ისინი ცუდი პარტნიორები იყვნენ, რადგან ხშირად რიგი პროექტების განხორციელებისას საწინააღმდეგო აზრი ჰქონდათ:

"დიდი იმედი მქონდა რომ თავიანთ გამოცდილებას, რაც მართლა აქვთ, იურიდიული განათლება, პოლიტიკაში ყოფნას და ა.შ. შეიტანდნენ კოალიციაში და კოალიციასაც ამ გზით განავითარებდნენ. საუბედუროდ მოხდა საპირისპირო. მათ ვერ მოახერხეს ასე ვთქვათ, ამ თვისებების დანერგვა, უფრო მეტიც, ისინი იყვნენ ცუდი პარტნიორები. მთელი ოთხი წლის განმავლობაში და მე თვალ-ყურს ვადევნებდი დინჯად".

ბიძინა ივანიშვილმა ასევე კონკრეტული მაგალითი მოიყვანა და აღნიშნა, რომ სუს-ის შსს-დან გამოყოფის დროს, რესპუბლიკელებს საწინააღმდეგო აზრი ჰქონდათ:

"ძალიან ხშირად, ძალიან ბევრ თემებში, რაც იყო პრინციპული, ბევრი პროექტი პარლამენტში, თუ მის გარეთ, ისინი როგორც წესი ოპოზიციის როლში მოგვევლინებოდნენ. მე გავიხსენებ ერთ-ერთს, ეს იყო როდესაც უსაფრთხოების სამსახური გამოეყო პოლიციას. ეს იყო ერთ-ერთი მნიშვნელოვანი პროექტი რაც განახორციელა ახალმა ხელისუფლებამ".

ივანიშვილის თქმით, რესპუბლიკელებმა საკუთარი ცოდნა ვერ გამოიყენეს კოალიციის სასარგებლოდ და ამბობს, რომ პარტიის ლიდერებს ნაციონალური მოძრაობის მსგავსი სურვილები ამოძრავებდათ:

"ხმალაძე არის ძალიან კარგი იურისტი, უსუფაშვილიც არის ძალიან კარგი იურისტი, მაგრამ რა რა დავინახეთ? მათი ცოდნა საქმეს საწინააღმდეგოდ მოხმარდა. იმდენად გაერთნენ ეს იურისტები, რომ დღეში ორ-ორ ახალ კანონს იგონებდნენ. დამოკიდიებულება ყველგან იგივე იყო, როგორმე დაესუსტებინა პოლიცია და დაესუსტებინა უსაფრთხოების სამსახური. იკვეთებოდა დიდი ეჭვი, რომ რა სურვილიც ჰქონდა ნაციონალურ მოძრაობას, თუ როგორ უნდა დაესუსტებინა სახელმწიფო სტრუქტურები, მათი [რესპუბლიკელების] როლი თანხვედრაში მოვიდა ნაციონალურ მოძრაობასთან. მცოდნე იურისტებს ავიწყდებოდათ მთავარი რომ უსაფრთხოების სამსახური არის ერთ-ერთი ძირითადი სამსახური ქვეყნის უსაფრთხოებისთვის.

ივანიშვილი ასევე აცხადებს, რომ რესპუბლიკური პარტიის წარმომადგენლებს არ აქვთ იმის ინტელექტუალური რესურსი, რომ სახელმწიფოზე იფიქრონ. მისივე თქმით, ისინი მთელ რესუსრსს ახმარენ საკუთარ პარტიას.