პრეზიდენტის ადმინისტრაციიდან 61 თანამშრომელი გათავისუფლდა. ამის შესახებ ინფორმაცია პრეზიდენტის პრესსპიკერმა, ხატია მოისწრაფიშვილმა On.ge-ს დაუდასტურა.

მისი თქმით, 37 თანამშრომელი გასაუბრების შედეგად ადმინისტრაციაში მუშაობას გააგრძელებს, 11 თანამშრომელი დეკრეტულ შვებულებაშია, მათ კანონი იცავთ და შესაბამისად, ისინი გასაუბრების გარეშე დარჩნენ სამსახურში, 61 თანამშრომელი კი, გათავისუფლდა.

"61 თანამშრომელი ამ რიცხობრივი შემცირების გამო მოხდა მობილობის სქემაში, რაც იმას ნიშნავს, რომ მომდევნო ერთი თვის განმავლობაში ისინი რჩებიან პრეზიდენტის ადმინისტრაციაში და აიღებენ თანამდებობრივ სარგოს, პარალელურ რეჟიმში მათ შესახებ ინფორმაცია იგზავნება საჯარო ბიუროში და საჯარო ბიურო მთელი ქვეყნის მასშტაბით ეძებს მათთვის მათი კომპეტენციისა და კვალიფიკაციის გამომდინარე, შესაბამის პოზიციებს", — თქვა მოისწრაფიშვილმა

მისივე განმარტებით, ამ თანამშრომლებისთვის შეთავაზება ერთი თვის განმავლობაში გაფორმდება, ყველა ვინც მიიღებს ახალ შეთავაზებას და დათანხმდება, გადავა ახალ სამსახურში, ხოლო ისინი, ვინც ან საკუთარი სურვილით ვერ მიიღებენ ან ვერ მოხდება მათი შესაბამისი კომპეტენციის ფარგლებში სამსახურის შეთავაზება, კომპენსაციის სახით კიდევ ერთი თვის თანამდებობრივ სარგოს აიღებენ.

ხატია მოისწრაფიშვილმა აქვე განმარტა, რომ პრეზიდენტის ადმინისტრაციისთვის კანონმდებლობით განისაზღვრა 60 საშტატო ერთხეული, რაც რეორგანიზაციის გამოცხადების საფუძველი გახდა.