ხორავას ქუჩაზე მოკლულის მამის, ზაზა სარალიძისა და მთავარი პროკურორის, შალვა თადუმაძის შეხვედრა დასრულდა. შეხვედრას, მთავარ პროკურორთან ერთად ზაზა სარალიძესთან დაკავშირებული ყველა საქმის პროკურორი ესწრებოდა.

ზაზა სარალიძის თქმით, მან კითხვებზე პასუხები ვერ მიიღო. ის ფიქრობს, რომ არასწორი ინფორმაცია მიაქვთ შალვა თადუმაძემდე.

"წინა შეხვედრის შემდეგ არაფერი შეცვლილა, ფაქტია, საქმის პროკურორები ცდილობენ მიხეილ კალანდიას საქმიდან გაყვანას. ჩემი ბრძოლა გაგრძელდება, იქამდე, სანამ ყველა არ იქნება პასუხისგებაში მიცემული, არა მხოლოდ კონკრეტულ საქმეში მონაწილე პირები არამედ ისინი, ვინც უხეშად ჩაერია ამ საქმეში, მივიღე პირობა, რომ დაწყებულია სამსახურებრივი მოკვლევა, ვნახოთ, რა პასუხს მივიღებთ უმოკლეს ხანში", — განაცხადა ზაზა სარალიძემ.

მან ასევე თქვა, რომ ის შეხვდება მთავარ პროკურორს სააპელაციო სასამართლოს დასრულების შემდეგ, რომ "დიდ კითხვას" პასუხი გაეცეს.

ხორავას ქუჩის საქმის ადვოკატის, ნესტან ლონდარიძის თქმით, მათ დააფიქსირეს ყველა ის დარღვევა, რასაც თვალს ადევნებენ სააპელაციო სასამართლოში.

"გენერალურმა პროკურორმა შემოგვთავაზა, რომ ჩვენთვის სასურველ ფორმატში მოხდეს საქმის გაცნობა. ჩენ ვგულისხმობთ გამოყოფილ საქმეს, რომელიც არის მნიშვნელოვანი და ჩვენ მივაწოდებთ მათ ინფორმაციას, როგორ ვუყურებთ საქმეს და რის დამატებას ვითხოვდით საქმეში. მე ორშაბათიდან შევუდგები საქმეს და ინფორმაცია გაგაცნობთ", — განაცხადა ნესტან ლონდარიძემ.

ნესტან ლონდარიძის თქმით, იყო საკითხები, რაზეც შეთანხმებას ვერ მიაღწიეს. ადვოკატის თქმით, საქმის დეტალებს დამოუკიდებლად გაივლიან და შემდეგ ისევ შეხვდებიან მთავარ პროკურორს.

"ჩვენთვის მნიშვნელოვანია გამოყოფილ საქმეზე მოხდეს რეაგირება. დაგვიდასტურეს, რომ იმ პროკურორების მიმართ, რომლებიც არიან საქმეში დაწყებულია გამოძიება მათ მიმართ", — აცხადებს ადვოკატი.

2017 წლის პირველ დეკემბერს ხორავას ქუჩაზე მომხდარი მკვლელობის ძირითადი საქმიდან გამოყოფილი საქმის ფარგლებში, გამოძიებით დადგინდა, რომ დ.ღ.-მ, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.

გამოძიების ცნობით, სასამართლო სხდომამდე დ.ღ. შეხვდა გარდაცვლილი დავით სარალიძის მშობელს და ესაუბრა ხორავას ქუჩაზე მომხდარი მკვლელობის ფაქტობრივ გარემოებებთან დაკავშირებით, თუმცა, სასამართლო განხილვის სტადიაზე მსგავსი შეხვედრა უარყო.