საქართველოს პარლამენტის თავმჯდომარის ირაკლი კობახიძის განცხადებით, კაბელების საქმეზე "პასუხი არ უგია იმას, ვინც დანაშაული ჩაიდინა". ამის შესახებ ირაკლი კობახიძემ ტოკ-შოუ რეაქციაში განაცხადა.

მისი თქმით, ის გაეცნო კაბელების საქმის მასალებს, თუმცა არ ამბობს, "ვის არ უგია პასუხი".

"კაბელების საქმეში მკაფიოდ გამოხატული დანაშაული იყო და საუბარი იყო მილიონების მითვისებაზე. იმ ადამიანებს კაპიკი არ წაუღიათ ვინც იყვნენ დაჭერილები. მე ჩემი ანალიზიდან გამომდინარე დავინახე, რომ ფული იყო გაკეთებული და ვინ წაიღო ეს სასამართლომ უნდა დაადგინოს. არ უგია პასუხი იმას, ვინც ფული წაიღო. დანაშაული იყო ჩადენილი, თუმცა ბოლომდე ვერ გაიხსნა, როგორც ჩანს, რაღაც დონეზე გაჩერდა", — განაცხადა ირაკლი კობახიძემ.

კითხვაზე, გულისხმობს თუ არა ირაკლი კობახიძე "დაუსჯელებს" შორის მაშინდელ თავდაცვის მინისტრს, ირაკლი ალასანიას, კობახიძე პასუხობს, რომ არაფრის თქმა არ შეუძლია.

"მე რა ვიცი იქ ფული დეპარტამენტის უფროსმა გააკეთა მინისტრის მოადგილემ თუ უფრო ზევით? საქმიდან ჩანს მოტივი და მე ამაზე მაქვს საუბარი", — განაცხადა კობახიძემ.

კაბელების საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

ე.წ. კაბელების საქმეზე მსჯავრდებული, თავდაცვის სამინისტროს ყოფილი მაღალჩინოსნები პრეზიდენტმა გიორგი მარგველაშვილმა 2017 წელს შეიწყალა