დღეს, 30 იანვარს თბილისის მერმა კახა კალაძემ ინფრასტრუქტურისა და ქონების მართვის სამსახურებს არსებული ლითონის საფეხმავლო ხიდების დემონტაჟი დაავალა, "ყველა იმ ადგილზე, სადაც ამის შესაძლებლობა იქნება". მერის განცხადებით, იქ სადაც საფეხმავლო ხიდებს აიღებენ, გაკეთდება ზებრა გადასასვლელები.

"პირდაპირ ვთქვათ, რომ საკმაოდ მოუხერხებელია, ასვლა, ჩამოსვლა. შშმ პირებისთვის არ არის ადაპტირებული და ეს სერიოზული პრობლემაა, — განაცხადა კალაძემ და მაგალითად მოიყვანა შარტავას ქუჩაზე, მერიის წინ არსებული ხიდი, რომელიც მისივე თქმით "სრულიად უფუნქციოა".