"საჭიროა ახალი სისხლი, ამ სიტყვის საუკეთესო გაგებით და შესაბამისად, ამაზე მუშაობა უკვე დაწყებულიც არის, რის შედეგებსაც საზოგადოება იხილავს", — ასე უპასუხა საქართველოს პარლამენტის თავმჯდომარემ, ირაკლი კობახიძემ საზოგადოებრივი მაუწყებლის ეთერში მმართველ გუნდში საკადრო ცვლილებებთან დაკავშირებით დასმულ კითხვა.

მისი თქმით, ამ ეტაპზე მხოლოდ მოსამზადებელი პერიოდია და რაიმე კონკრეტული მონახაზი არ არის გამოკვეთილი. ის ამბობს, რომ წელიწადნახევარში "გახურებული" საარჩევნო კამპანია დაიწყება და ამისთვის მომზადება უკვე დღეს არის დასაწყები.

"მათ შორის, საკადრო პოლიტიკის კუთხით, საჭიროა გუნდის მუდმივად განახლება. ნებისმიერი არჩევნებიდან არჩევნებამდე საჭიროა ფიქრი იმაზე, რომ გუნდი მუდმივად განახლებას საჭიროებს. ამ ეტაპზე, მხოლოდ მოსამზადებელი პერიოდი გვაქვს და საკადრო კუთხით ჯერჯერობით რამე კონკრეტული მონახაზიც კი არ არის გამოკვეთილი", — აღნიშნა პარლამენტის თავმჯდომარემ.