კონგრესის წარმომადგენლობითმა პალატამ მიიღო კანონპროექტი, რომლითაც აშშ-ს პრეზიდენტს ნატოდან ქვეყნის ერთპიროვნულად გამოყვანა ეკრძალება. 22 იანვარს ორპარტიულ კანონპროექტს მხარი პალატის 357 წევრმა დაუჭირა მხარი, წინააღმდეგი იყო 22.

კანონპროექტი დასამტკიცებლად ახლა სენატს გადაეცა, შემდეგ ხელმოსაწერად კი პრეზიდენტს გაეგზავნება. კენჭისყრამდე პრესკონფერენციაზე დემოკრატებმა განაცხადეს, რომ ალიანსის მიმართ პრეზიდენტ დონალდ ტრამპის დამოკიდებულებით შეშფოთებული არიან.

"კანონპროექტი ცხადყოფს, რომ აშშ-ს კონგრესს ჯერ კიდევ სჯერა ჩრდილოატლანტიკური ალიანსის და მისი შესუსტებისა და ალიანსიდან ერთპიროვნული დატოვების ყველანაირ მცდელობას შეეწინააღმდეგება", — განაცხადა დემოკრატმა კონგრესმენმა, სტენი ჰოიერმა.

ჰოიერის თქმით, პრეზიდენტმა უარყოფითი დამოკიდებულება ალიანსის მიმართ არაერთხელ დააფიქსირა:

"რაღაც მხრივ, სიგიჟეც კი არის, რომ ამის გაკეთება გვიწევს".

დონალდ ტრამპის გაპრეზიდენტების შემდეგ აშშ-მ პარიზის კლიმატის შეთანხმება, უნესკო და ირანის ბირთვული შეთანხმება დატოვა, რასაც დემოკრატი და რესპუბლიკელი სენატორებისა და კონგრესმენების მხრიდან კრიტიკა მოჰყვა.

დონალდ ტრამპმა ნატოს მოძველებული გაერთიანება არაერთხელ უწოდა და მისი წევრი ქვეყნები თავდაცვისთვის მცირე ხარჯების გამოყოფაში დაადანაშაულა. ერთი კვირის წინ The New York Times-მა წყაროებზე დაყრდნობით დაწერა, რომ ტრამპმა ალინსის დატოვებაზე მრჩევლებთან ისაუბრა. სწორედ ამ სტატიის შემდეგ კონგრესში მეორედ შეიტანეს კანონპროექტი, რომელიც სენატის თანხმობის გარეშე პრეზიდენტს ალიანსის დატოვებას უკრძალავს.