თბილისის მერმა, კახა კალაძემ მთავრობის სხდომაზე ვაკის პარკში სასტუმროს მშენებლობასთან დაკავშირებით კიდევ ერთხელ ისაუბრა. მან ინვესტორს მიმართა და უთხრა, რომ "შანტაჟის ენით იმას ესუაბროს, ვისთანაც გასდიოდა".

კალაძემ დედაქალაქის მთავრობის სხდომაზე ყოფილი მერი, გიგი უგულავა გააკრიტიკა და მას კორუმპირებული უწოდა.

"გამოდის მეამიტი სახით და ბოდიშს უხდის საზოგადოებას ძირითადად ჩემი გამონათვქამების გამო და არა იმის გამო, რაც მან ჩაიდინა ქალაქის წინაშე და რა შეცდომები აქვს დაშვებული", — აღნიშნა მერმა.

სასტუმრო ბუდაპეშტის დამფუძნებელი და თბილისის მერი და მისი მოადგილეები 21 იანვარს შეხვდნენ ერთმანეთს. როგორც მხარეები ამბობენ, მათ შეთანხმებას ვერ მიაღწიეს. შეხვედრის შემდეგ ინვესტორმა, გიორგი ზაქაიძემ განაცხადა, რომ მერია საზოგადოების მცირე ნაწილის ზეწოლის ქვეშ არის და "ხელების გადაგრეხვაზე არიან გადასულები".

როგორც ზაქაიძემ ჟურნალისტებს უთხრა, მერიამ მიწის ნაკვეთის გაცვლა ან რესტორნის აშენება შესთავაზა, რომელიც ვაკის პარკში ისტორიულად იყო. მისივე თქმით, კომპანიისთვის ყველა პირობა მიუღებელია, ნებართვის არაღდგენის შემთხვევაში სასამართლოს მიმართავენ და ზიანის ანაზღაურებასაც მოითხოვენ.

სასტუმროს მშენებლობა ვაკის პარკში

2013 წლის 24 ივლისის განკარგულებით, თბილისის მერმა, გიგი უგულავამ თბილისში, ჭავჭავაძის #68-ში არსებულ მიწის ნაკვეთზე სასტუმროს განთავსების მიზნით სპეციალური (ზონალური) შეთანხმება გასცა, რომლითაც ქალაქთმშენებლობითი პარამეტრები გაიზარდა. ამავე წლის 20 სექტემბრის ბრძანებით, არქიტექტურის სამსახურმა თბილისში ჭავჭავაძის გამზირ #68-ში სასტუმროს მშენებლობის ნებართვა გასცა.

აღნიშნული განკარგულებისა და ბრძანების გაუქმება მწვანე ალტერნატივამ 2014 წელს საქალაქო სასამართლოში მოითხოვა. ორწლიანი დავის შემდეგ საქალაქო სასამართლომ სარჩელი ნაწილობრივ დააკმაყოფილა — სადავო საკითხის გადაუწყვეტლად მერიის 24 ივლისის განკარგულება ბათილად იქნა ცნობილი.

2016 წელს მწვანე ალტერნატივამ სააპელაციო საჩივარი წარადგინა და წინა ინსტანციის გადაწყვეტილების იმ ნაწილში გაუქმება მოითხოვა, რომლითაც საჩივარი ნაწილობრივ დაკმაყოფილდა და მოითხოვა სარჩელის სრულად დაკმაყოფილება. საქალაქო სასამართლოს გადაწყვეტილება გაასაჩივრეს, ასევე, შპს გრაალმა და შპს ტიფლის კოსტავამ, რომლებიც აშენებენ სასტუმრო ბუდაპეშტს.

2018 წლის 28 მაისს თბილისის სააპელაციო სასამართლომ დააკმაყოფილა კომპანიების სარჩელი და გააუქმა საქალაქო სასამართლოს გადაწყვეტილება.

ამავე თემაზე: