ჭყონდიდის მიტროპოლიტი პეტრე სხალთის მთავარეპისკოპოსის სპირიდონის ბრალდებების განსახილველად საეკლესიო სასამართლოს მოწვევას ითხოვს. როგორც მეუფე პეტრე თავის განცხადებაში განმარტავს, ბრალდებების ვერდამტკიცების შემთხვევაში მან კათედრა უნდა დატოვოს. გარდა ამისა, ის ითხოვს, რომ ექვსი თვის ვადაში მეზობელმა ეპისკოპოსებმა მეუფე სპირიდონის ქმედებები განიხილონ.

დეკემბრის ბოლოს ჩატარებული სინოდის სხდომის შემდეგ ჭყონდიდის მიტროპოლიტმა განაცხადა, რომ პატრიარქის მწყემსიკეთილობის შესახებ მითი საბოლოოდ დაიმსხვრა. ამის გამო 15 იანვარს, ქადაგების დროს სხალთის მთავარეპისკოპოსმა მეუფე პეტრე პატრიარქის წინააღმდეგ ბრძოლაში დაადანაშაულა. ამბიონიდან მეუფე სპირიდონი ჭყონდიდის მიტროპოლიტს შეურაცხმყოფელად მოიხსენიებდა.

"პატრიარქს ვინც ებრძვის, ყველა თავის თავს უშავებს. სამარცხვინოა, კაცო, ისო, დაიმსხვრა მითიო, რომ პატრიარქი მწყემსი კეთილიაო. გამოვიდა, რომ მწყემსი კეთილი შენა ხარ, შე უბედურო? როგორ გითხრა ახლა — არაფერი არ იქნებოდი საერთოდ, ნოლი იქნებოდი საერთოდ, ვინ იცის, სად იქნებოდი. პატრიარქმა კაცი გაგხადა და შენ ებრძვი პატრიარქს", — ამბობდა მეუფე სპირიდონი.

მეუფე პეტრე საპასუხო განცხადებაში ამბობს, რომ სხალთის მთავარეპისკოპოსის ქადაგება მრევლში გაორებას იწვევს. მისივე თქმით, მეუფე სპირიდონის მიმართ ბევრი კითხვა დაგროვდა, რაზეც პასუხი არავის მიუღია.

"ნაცვლად სინანულისა, კადნიერად და უსინდისოდ ეწევით ცილისწამებას, ილანძღებით და ფარისევლობთ. მე როგორც სინოდის წევრს, ჩემი სინდისი მავალდებულებს ხმა აღვიმაღლო ამ უსამართლობისა, უზნეობისა და უპრინციპობის წინააღმდეგ. თქვენ კი ბრალს მდებთ, რომ თითქოს სხვის დავალებას ვასრულებ და ვახმოვანებ. ეჭვი მიჩნდება, რომ სინდისის ხმას არასოდეს აყოლილხართ ან არ შეუწუხებიხართ და არ განგიცდიათ სინდისის ზეწოლა ერისა და ეკლესიის საკეთილდღეოდ", — ნათქვამია ჭყონდიდის მიტროპოლიტის განცხადებაში.