ჯვრის მონასტრის საძმო აცხადებს, რომ მონასტერი გარემოვაჭრეების გამო გარეთ შექმნილი "ანტისანიტარიისა და განუკითხაობის" გამო დახურეს. მათი განმარტებით, იციან რამდენად მნიშვნელოვანია მეექვსე საუკუნის ძეგლი, თუმცა იძულებულები იყვნენ გამოეყენებინათ "გამოხატვის უკიდურესი ფორმა". საძმოს განცხადებას რადიო თავისუფლება ავრცელებს.

"2017 წლიდან მონასტრის მიმდებარე ტერიტორიაზე, ეკლესიასა და ადგილობრივ ხელისუფლებასთან შეთანხმების გარეშე, კანონის დარღვევითა და დადგენილი წესების უგულებელყოფით მოვაჭრეებმა დაიკავეს ავტოსადგომის ტერიტორია და დაიწყეს უკანონო საქმიანობა, რამაც ადგილზე წარმოშვა ანტისანიტარია და განუკითხაობა", — ნათქვამია განცხადებაში.

მათივე თქმით, წელიწადზე მეტია ითხოვენ პრობლემის მოგვარებას და ადგილობრივი ხელისუფლება პირდებოდა გადაწყვეტას, თუმცა შედეგი ვერ მიიღეს.

გარევაჭრობის გამო მცხეთის ჯვრის მონასტრის კარები ვიზიტორებისთვის მეორე დღეა დაკეტილია. გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო.

ჯვრის მონასტერთან მისულმა მცხეთის მერმა, გიორგი კაპანაძემ განაცხადა, რომ გარემოვაჭრეების გამო მონასტრის დაკეტვა მიუღებელი და სამარცხვინო ფაქტია. მისი თქმით, ადგილი, სადაც გარემოვაჭრეები დგანან მუნიციპალიტეტის ტერიტორიაა და არა მონასტრის.

მცხეთის ჯვრის მონასტერი VI საუკუნის კულტურული ძეგლია, რომელიც ტურისტებს შორის დიდი პოპულარობით სარგებლობს. ის მსოფლიო კულტურული მემკვიდრეობის ძეგლთა სიაში არის შეტანილი.