ხორავას ქუჩაზე მომხდარი მკვლელობის საქმეზე ცრუ ჩვენების მიცემის ბრალდებით დაკავებული დ.ღ. დარბაზიდან გაათავისუფლეს. სასამართლომ დაცვის მხარის შუამდგომლობა დააკმაყოფილა. მას აღკვეთის ღონისძიების სახით 5 000-ლარიანი გირაო შეეფარდა. გირაოს შეფარდება საქმეზე საბოლოო განაჩენს არ ნიშნავს. დ.ღ.-ს საქმეზე პროცესი საქმის არსებითი განხილვით გაგრძელდება.

19 იანვარს გადის 6-თვიანი ვადა, როცა დ.ღ.-სთვის არასრულწლოვანთა მართლმსაჯულების კოდექსით აღკვეთის ღონისძიებად პატიმრობა შეიძლება იყოს შეფარდებული.

გამოძიების ვერსიით, დ.ღ.-მ, რომელიც უშუალოდ შეესწრო დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.

ბრალდების მხარის მტკიცებით, სასამართლო სხდომამდე დ.ღ. შეხვდა გარდაცვლილი დავით სარალიძის მამას, ზაზა სარალიძეს და ესაუბრა ხორავას ქუჩაზე მომხდარი მკვლელობის ფაქტობრივ გარემოებებთან დაკავშირებით, თუმცა, სასამართლო განხილვის სტადიაზე მსგავსი შეხვედრა უარყო.

გაიგე მეტი: