იუსტიციის უმაღლესი საბჭოს არამოსამართლე წევრები, ნაზი ჯანეზაშვილი და ანა დოლიძე საკანონმდებლო წინადადებას უზენაესი სასამართლოს მოსამართლეობის კანდიდატების არჩევის პროცედურების შესახებ პარლამენტში მომავალ კვირას შეიტანენ.

ნაზი ჯანეზაშვილის განცხადებით, საკანონმდებლო ინიციატივა რამდენიმე დებულებას მოიცავს, მათ შორის ერთ-ერთი ინტერესთა კონფლიქტის აღმოფხვრას ისახავს მიზნად.

"იუსტიციის საბჭოს მოქმედ წევრებს არ უნდა ჰქონდეთ უფლება საკუთარი თავი დაასახელონ კანდიდატად. ეს არის აშკარა ინტერესთან კონფლიქტი და ვფიქრობ, რომ მიქაუტაძეს და გვრიტიშვილს არ უნდა ჰქონდეთ უფლება საკუთარი თავი დაასახელონ", — განაცხადა ჯანეზაშვილმა.

კანონპროექტის მიხედვით, უზენაესი სასამართლოს მოსამართლეები ღია კონკურსის წესით უნდა აირჩიონ.

"რამდენიმე ძირითად საკითხადაა დაყოფილი პროექტი. პირველი არის ის, რომ გამოცხადდეს კონკურსი, რათა არ მივიღოთ მოცემულობა, რომ გიორგი მიქაუტაძემ ფურცლის ნაგლეჯიდან ამოიკითხოს გვარები. ეს არის შეურაცხყოფა, თუნდაც მართლმსაჯულების სისტემისა და პარლამენტისაც. ასევე უნდა შეიქმნას კომისია, რომელიც განიხილავს კონკურსია წესით შემოსულ განაცხადებს, შემდეგ გადაუგზავნის იუსტიციის უმაღლეს საბჭოს და შემდგომ პარლამენტს", — განმარტა ჯანეზაშვილმა.

ამავე თემაზე: