ლეიბორისტული პარტიის ლიდერი, შალვა ნათელაშვილი გრიპის ვირუსების გამო ქვეყანაში საგანგებო მდგომარეობის გამოცხადებას ითხოვს. ამის შესახებ მან საგანგებო ბრიფინგი გამართა.

შალვა ნათელაშვილის თქმით, ხელისუფლება გრიპის ვირუსს საკუთარი ინტერესებისთვის იყენებს. ის მოითხოვს გადაიდოს სასწავლო პროცესი "ეპიდებიის ჩავლამდე" და მთავრობის სარეზერვო ფონდიდან თანხა გამოიყოს.

"საახალწლოდ ქვეყანას მოედო გრიპის ეპიდემია. გარდაცვლილია ათეულზე მეტი ადამიანი. ოლიგარქიულმა ხელისუფლებამ ვირუსული ტრაგედიაც გამოიყენა მილიონების საშოვნელად, შექმნა აფთიაქებში წამლის ხელოვნური დეფიციტი, მედიკამენტების გაყიდვა კი დაიწყო ხუთმაგად და ათმაგად გადიდებულ ფასებში. მდგომარეობა სერიოზულია. მოვითხოვ, კონსტიტუციის თანახმად მთელს ქვეყანაში საგანგებო მდგომარეობის გამოცხადებას, მედიკამენტების გაცემას და მკურნალობას სრულიად უფასოდ, მთავრობის სარეზერვო ფონდიდან თანხების გამოყოფას, სასწავლო პროცესის გადავადებას ეპიდემიის ჩავლამდე", — განაცხადა ნათელაშვილმა.

განათლების სამინისტრომ მიიღო გადაწყვეტილება გავრცელებული გრიპის ვირუსის გამო სკოლებში სწავლის გადადების თაობაზე. ასევე სწავლა გადაიდო თბილისის ბაგა-ბაღებშიც 21 იანვარმდე. საქართველოს განათლების სამინისტრომ სკოლებს რეკომენდაციებით მიმართა, გრიპის ვირუსის გავრცელების პრევენციის მიზნით, შენობებში სადეზინფექციო სამუშაოები ჩაატარონ. ბოლო ინფორმაციით, ე.წ. ღორის გრიპს 10 ადამიანი ემსხვერპლა.

დაავადებათა კონტროლის ცენტრის ცნობით, საზოგადოებაში უსაფუძვლო პანიკაა და გრიპის ვირუსი წინა წლების მსგავსად პროგრესირებს.

გრიპის თავიდან აცილების საუკეთესო საშუალებაა ვაქცინაცია. გრიპის ვირუსი მუდმივად განიცდის ცვლილებებს, შესაბამისად, მისი საწინააღმდეგო ვაქცინა ყოველწლიურადაა საჭირო. ჩრდილოეთ ნახევარსფეროში გრიპის სეზონი ჩვეულებრივ შემოდგომა-ზამთრის პერიოდში დგება, შესაბამისად, ოქტომბერი არის საუკეთესო დრო გრიპის ვირუსის საწინააღმდეგო ვაქცინაციისთვის.

ამავე თემაზე: