რუსულ სტარტაპ StartRocket-ს სურს, რომ ღამის ცაზე ბილბორდის ტიპის მანათობელი რეკლამები განათავსოს. ამის მიღწევას ის პატარა ზომის თანამგზავრებით, CubeSat-ებით გეგმავს.

პროექტის ავტორის, ვლად სიტნიკოვის თქმით, ეს სარეკლამო სივრცეში შემდეგი ლოგიკური ნაბიჯია. კომპანიამ ვიდეოც გაავრცელა, სადაც ჩანს თუ როგორი იქნება ღამის ცაზე გამოკიდული ბილბორდები.

"ბრენდებსა და ღონისძიებებს ჩვენზე უდიდესი გავლენა აქვთ. იქნება ეს კოკა-კოლა, ოლიმპიური თამაშები, მერსედესი თუ ფიფა. ადამიანები მალე კოსმოსში ცხოვრებას დაიწყებენ და ჩვენი კულტურაც დედამიწას გაცდება. რაც უფრო პროფესიონალურად მოხდება ეს ყველაფერი, მით უკეთესი", - აცხადებს ის.

StartRocket-ის თქმით, ისინი "ორბიტალურ ეკრანს" 2020 წელს გაუშვებენ, 2021 წლისთვის კი CubeSat-ები რეკლამების ჩვენებას დაიწყებენ. თანამგზავრები ზედაპირიდან 400-500 კილომეტრის სიმაღლეზე იქნებიან განლაგებულნი. თითოეული გადაფრენისას მათი დანახვა ექვსი წუთის განმავლობაში იქნება შესაძლებელი.

რა დაჯდება ეს ყველაფერი, ჯერჯერობით უცნობია, თუმცა კომპანია აცხადებს, რომ ბრენდებს ამაში ფულის გადახდა არ დაენანებათ, რადგან მათი თქმით, "ეგო მზეზე უფრო მეტად კაშკაშებს", რაშიც ნამდვილად ვერ შევეწინააღმდეგებით.

რენდი სეიგალი კოსმოსისა და თანამგზავრების სფეროში მომუშავე ადვოკატია, მისი თქმით, პროექტის განხორციელება ტექნიკურად შესაძლებელია, თუმცა კომპანიას შეიძლება სამართლებრივი დაბრკოლებები შეექმნას.

სეიგალის თქმით, პირველი გამოწვევა, რაც კომპანიას შეეხება ავიაციის უსაფრთხოებაა. შექმნის თუ არა რაიმე საფრთხეს ან დაბრკოლებას ორბიტაზე მყოფი რეკლამები?

სეიგალის თქმით, ეს ამ ტიპის პირველი პროექტი არ არის. მაგალითად, იაპონიური სტარტაპი გეგმავს, რომ ორბიტაზე მცირე ზომის თანამგზავრები გაუშვას, რომლებიც სასურველ დროს ცაზე "ვარსკვლავის ჩამოვარდნის" ეფექტს შექმნიან. ეს სპეციალური ნივთიერებით დამზადებული პატარა ბურთების გამოთავისუფლებით მოხდება, რომლებიც ატმოსფეროში სხვადასხვა ფრად დაიწვება.

დიდი ალბათობაა იმისა, რომ საზოგადოება ამ იდეას უარყოფითად შეხვდეს, რადგან ამ პროექტმა ღამის ცა შესაძლოა ჩვეულებრივ სარეკლამო სივრცედ აქციოს.

StartRocket-ის გუნდის წევრს, ალექსი სკორუპსკის კი მიაჩნია, რომ კოსმოსის კომერციალიზაცია გარდაუვალია.