წლევანდელი ოქროს გლობუსის ერთ-ერთი ტრიუმფატორი რეჯინა კინგი გახდა. მსახიობმა ჯილდო ფილმში If Beale Street Could Talk შესრულებული როლისთვის მიიღო.

ბევერლი ჰილტონის სცენაზე ასულმა კინგმა კი საკუთარი გამოსვლით კიდევ უფრო მეტი ყურადღება მიიპყრო და მეტიც, მის სიტყვას მთელი დარბაზი ფეხზე წამომდგარი შეხვდა.

მას შემდეგ, რაც მსახიობმა ჯილდო აიღო, მადლობა გადაუხადა პროდიუსერებს და მის კოლეგებს, შემდეგ კი მთავარ ნაწილზე გადავიდა და ძალიან მნიშვნელოვან თემას შეეხო.

"მიზეზი, რის გამოც ჩვენ ამას ვაკეთებთ არის ის, რომ ტრიბუნა გვაქვს და შეგვიძლია ხმა ყველას მივაწვდინოთ. სწორედ ამიტომ, მინდა გამოვიყენო პლატფორმა და გითხრათ, რომ მომდევნო ორი წლის განმავლობაში, ვდებ ფიცს, რომ ჩემს ყველა პროექტში, რომლის პროდიუსერიც ვიქნები ქალები 50%-ით იქნებიან წარმოდგენილი და ამაში გიწვევთ ყველას, ვისაც ამ გადაწყვეტილების მიღება შეუძლია და არამხოლოდ კინო ინდუსტრიაში, არამედ ყველგან. გიწვევთ ცვლილებებისთვის, დადექით ჩვენთან და იყავით სოლიდარულები", - თქვა სიტყვით გამოსვლისას რეჯინა კინგმა.

პრობლემა, რომელსაც მსახიობი შეეხო, აქტუალურია ყველა სფეროში. კინოში კი თავს ძირითადად კამერის მიღმა მომუშავე გუნდში იჩენს. მაგალითად, მიუხედავად იმისა, რომ თემისადმი მგრძნობელობა ნელ-ნელა იზრდება, კინოკომპანიები მაინც ერიდებიან ქალი რეჟისორებისა თუ პროდიუსერების დაქირავებას.

ასევე, დღემდე პრობლემად რჩება ქალ მთავარ პერსონაჟებზე გადაღებული მხატვრული ფილმი.

Annenberg-ის საგანმანათლებლო ცენტრის ერთ-ერთი კვლევის თანახმად, 2014 წლის ასი ყველაზე წარმატებული ფილმის პერსონაჟების მხოლოდ 28,1 პროცენტი იყო ქალი.

თუმცა, სავარაუდოდ ეს მიდგომა მალე შეიცვლება, რადგან ბოლო კვლევების მიხედვით, ფილმები, რომლებშიც მთავარი პერსონაჟი ქალია, უფრო შემოსავლიანია.

კვლევაში აღნიშნავენ, რომ ბოლო პერიოდში განსაკუთრებულად იზრდება მთავარი ქალი პერსონაჟების რიცხვი კინოში, თუმცა ამ კუთხით გასაკეთებელი კიდევ ბევრია, ამისთვის სხვადასხვა საპროდიუსერო თუ კინო კომპანიები აქტიურად თანამშრომლობენ Time’s Up კამპანიასთან.