ველისციხესთან საპროტესტო აქციის დროს ნაციონალური მოძრაობის მხარდამჭერის, შოთა დალაქიშვილის ცემის ბრალდებით კიდევ ერთი პირი დააკავეს. ბრალდებულს 5 იანვარს გურჯაანის რაიონულმა სასამართლომ წინასწარი ორთვიანი პატიმრობა შეუფარდა.

როგორც შინაგან საქმეთა სამინისტრომ On.ge-ს უთხრა დაკავებულს ბრალი სისხლის სამართლის კოდექსის 118-ე მუხლის მესამე ნაწილით წაუყენეს, რაც ჯანმრთელობის განზრახ ნაკლებად მძიმე დაზიანებას გულისხმობს. ისჯება თავისუფლების აღკვეთით ვადით სამიდან ხუთ წლამდე, იარაღთან დაკავშირებული უფლებების შეზღუდვით ან უამისოდ.

შოთა დალაქიშვილის ცემაში ბრალდებულებს, გოჩა მაისურაძესა და მამუკა უსინაშვილს სასამართლომ წინასწარი პატიმრობა 21 დეკემბერს შეუფარდა.

დაპირისპირება ველისციხეში

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის განცხადებით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.

აქციიდან მეორე დღეს, 17 დეკემბერს პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის ერთიანი ნაციონალური მოძრაობის წევრი, დავით კირკიტაძე დააკავეს. მას აღკვეთის ღონისძიებად პატიმრობა შეეფარდა.

ასევე დააკავეს პირი, რომელმაც პოლიციის მანქანა დააზიანა. გარდა ამისა დაკავებულია პირი, რომელსაც დეპუტატების თამარ ხულორდავასა და სოფიო ქაცარავას მანქანის დაზიანება.