უმრავლესობის დეპუტატი, იურიდიული კომიტეტის ყოფილი თავმჯდომარე ეკა ბესელია აცხადებს, რომ გავრცელებული ხმები მისი გუნდიდან წასვლის შესახებ სიმართლეს არ შეესაბამება. მისი თქმით, გუნდში რჩება და უზენაესი სასამართლოს მოსამართლეების შერჩევის საქმეს ბოლომდე მიიყვანს. ამის შესახებ მან რუსთავი 2-თან ინტერვიუში ისაუბრა.

"რა პოზიციდან ან რომელი როლიდან შევძლებ ამის უკეთ გაკეთებას ამაზე ვისაუბრებ, ალბათ, ოდნავ მოგვიანებით, ახალი წლის შემდეგ", — ასე უპასუხა ბესელიამ კითხვას ახალი თანამდებობის დაკავების შესახებ.

ბესელიამ აღნიშნა ისიც, რომ მას გუნდურობაზე მითითება არ სჭირდება და პირიქით, შეუძლია სხვას აუხსნას რას ნიშნავს გუნდურობა და სხვის შეცდომებზე პასუხისმგებლობის აღება.

ეკა ბესელიამ იურიდიული კომიტეტის თავმჯდომარის პოსტი 27 დეკემბერს დატოვა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. ბესელიას გადადგომას მოყვა განცხადებები გუნდში სავარაუდო დაპირისპირებების შესახებ.

ბესელიას თქმით, მას არავისთან არ აქვს დაპირისპირება და უბრალოდ "განსხვავებული პოზიციები" აქვს. მისივე განმარტებით, არის საკითხები, რომელზეც ის საჯაროდ არ ისაუბრებს.

"თუ მომიწევს რაღაცებზე პასუხის გაცემა და თუ ამის აუცილებლობის წინაშე დავდგები, რომ იქნება ისეთი გამონათქვამები, რომელიც არ იქნება რეალური და სიმართლე, მე მომიწევს ამაზე პასუხის გაცემა და ჩემი პასუხი არ იქნება ტკბილი", — განაცხადა დეპუტატმა.